AILEU, 06 juñu 2023 (TATOLI) – Xefe Suku Asumau Postu Administrativu Remexio Munisípiu Aileu Adão Fernandes, informa komunidade maioria 98% mak asesu ona ba energia elétrika.
“Ha’u-nia komunidade asesu hotu ona ba liña eletrifikasaun kuaze 98% hanesan ne’e, hela 2% mak seidauk asesu tanba distánsia uma-kain dook malu tebes maibé ami esforsu agora komesa hatur ona ai-rin eletrisidade nian, iha tempu besik komunidade sira asseu hotu ona”, Xefe Suku dehan ba Agência TATOLI iha Remexio, tersa ne’e.
Aleinde ne’e, iha mós dezenvolvimentu infrastrutura bázika, hanesan estrada, empreza balun komesa dudu ona, fiar katak iha tempu besik komunidade sira asesu ona ba estrada ne’ebé di’ak.
Nune’e mós, kona-ba Uma Naroman ba Povu iha Suku Asumau, komunidade uma-kain 10 mak sei hetan tanba sei iha prosesu konstrusaun no iha tempu besik sei finaliza.
Suku Asumau kompostu hosi Aldeia tolu mak Lerolisa, Fatumenaru no Aimera-Hun ho nia populasaun hamutuk 3095 no maioria komunidade moris ho vida agrikultura.
Jornalista: Hortencio Sanchez
Editór : Zezito Silva
