SEKoop: “lei ekonomia sosiál fó kbiit kooperativa sai sentru dezenvolvimentu”
DILI, 06 juñu 2023 (TATOLI)—Sekretáriu Estadu Kooperativa (SEKoop), Elizário Ferreira, konsidera lei ekonomia sosiál ne’ebé hetan ona promulgasaun bele fó kbiit ba kooperativa sai sentru ba dezenvolvimentu ekonomia sosiál.
“Agradese ba Prezidente Repúblika, Parlamentu Nasionál, Deputadu sira hotu, liu-liu membru Komisaun D ne’ebé hola ona inisiativa hodi aprezenta lei ekonomia sosiál hodi fó kbiit ba kooperativa sai sentru ba dezenvolvimentu ekonomia sosiál no responsabilidade baze dadus ba ajente ekonómiku no sosiál sira hanesan kooperativa, asosiasaun, mutualista, asosiasaun karitativa no seluk tan,” Sekretáriu Estadu Elizário hateten liuhosi konferénsia imprensa iha salaun SEKoop, Akait, tersa ne’e.
Lei ekonomia sosiál hetan aprovasaun iha Parlamentu Naionál iha marsu 2022 no promulgadu hosi Prezidente Repúblika iha abríl 2022.
Tuir governante ne’e, lei ne’e inisia faze foun hodi hamosu modelu organizasaun atu introdús iha sosiedade timor-oan hodi fó resposta sosiál no ba dezenvolvimentu sustentável nasaun nian.
Notísia relevante : PN aprova projeitu lei baze ekonomia sosiál
Sekretáriu Estadu deskreve iha artigu 50 kona-ba prinsípiu orientadora haktuir katak entidade ekonomia sosiál autónoma iha ámbitu ba atividade no akordu hamutuk iha prinsípiu hitu hodi fó importánsia ba ema ho objetivu sosiál, adesaun no partisipasaun livre no voluntáriu. Iha kontrolu demokrátikamente hosi ninia membru sira, konsiliasaun entre interese membru, utilizadór ka benefisiáriu no interese komun, fó respeitu ba valór soliedariedade, igualdade no la dikriminativu ba koezaun sosiál, justisa, ekidade, transparénsia, responsabilidade individual, sosiál no subsidiáriu.
Aleinde ne’e, SEKoop nia responsabilidade ba promosaun kooperativa ne’ebé define iha Planu Estratéjiku Dezenvolvimentu Kooperativa (PEDC, sigal portugés) 2020-2030, ne’ebé fó hanoin fali presiza atu hala’o implementasaun ba lei ekonomia sosiál, lei baze ba kooperativa, dekretu-lei komersializasaun, dekretu-lei kooperativa agríkola, dekretu-lei kooperativa peska no prosesa, proposta dekretu-lei kooperativa kréditu hodi hetan aprovasaun iha Konsellu Ministru.
“Ha’u nu’udar kooperativista sei nafatin promove, divulga no hala’o operasionalizasaun, hamutuk ho individuu, koletivu ka kooperativa ne’ebé opta nu’udar entidade ekonomia sosiál tuir ekonomia Timor-Leste relevante, iha sirkunstánsia ba transizaun governativa SEKoop sei hola responsabilidade hodi transfere informasaun hotu ba SEKoop foun ne’ebé sei mai,” nia tenik.
Governante ne’e dehan, atu fó komprimentu ba lei ekonomia sosiál maka iha tinan 2022 SEKoop aprezenta alterasaun ba dekretu-lei baze kooperativa nian, ne’ebé aprezenta ba Konsellu Ministru dekretu-lei tolu kona-ba rejime ba kooperativa komersializasaun, kooperativa agríkola, peska no kooperativa kréditu, ne’ebé hetan apresiasaun no sei iha prosesu.
“Ho lei ekonomia sosiál ne’ebé hetan ona aprovasaun nu’udar rekoñesimentu ida ba eroi boot sira hanesan Saudozu Prezidente Nicolau dos Reis Lobato no Komisariu FRETILIN Vicente Manuel dos Reis (Byeky Sahe), ne’ebé nu’udar fundadór no protetór ba kooperativa, ekonomia sosiál no solidária iha Timor-Leste iha meadu tinan 1975. Nune’e, rejista mós kontribuisaun hosi parte ekipa téknika SEKoop nian tuir kompeténsia no responsabilidade realiza serbisu hodi fó espresaun atualizadu no dispostu ba artigu 1380 K-RDTL no artigu seluk ne’ebé ko’alia kona-ba ekonomia sosiál,” Sekretáriu Estadu deskreve.
Jornalista : Arminda Fonseca
Editora : Julia Chatarina
