DILI, 07 juñu 2023 (TATOLI)—Autoridade Nasionál Petróleu no Minerál (ANPM), iha kuarta ne’e, hateten, postu abastesimentu kombustível sira ne’ebé taka tanba menus kombustível, semana oin bele loke no fa’an normál fali.
“Ohin ami hakarak hato’o ba públiku katak ita menus de’it mak gazolina la’ós laiha, situasaun ida-ne’e ami serbisu hela hamutuk ho fornesedór fatin rua, Pertamina International no Esperansa Timor-oan (ETO Timor) bele jere kombustível to’o domingu, tanba iha domingu lororaik ró ne’ebé tula kombustível hosi ETO nian sei to’o Hera, entaun segunda normál fali,” Diretór Downstream, Nelson de Jesus, relata iha edifísiu ANPM, Ministériu Finansa, Aitarak-Laran, kuarta ne’e.
Nia dehan, to’o momentu ne’e, kombustível ne’ebé sei iha hodi fornese ba públiku hamutuk tonelada 330, kompostu hosi fornesedór Pertamina International tonelada 125 no ETO tonelada 205.
“Hosi situasaun ne’e fornesedór kombustível bele hasai de’it tonelada 25 kada loron, hahú ohin to’o domingu depende sira hakarak fó ba postu abastamentu kombustível ida ne’ebé. Entaun postu abastamentu kombustível balun sei la hetan tanba sira fó prioridade ba estasaun kombustível balun iha Dili no iha munisípiu,” nia akresenta.
Notísia relevante : Estasaun kombustível iha Dili taka tanba estoke mina hotu
Diretór ne’e mós nota hela katak loron hirak ne’e mosu engarafamentu tanba kombustível iha postu abastamentu menus.
“Maibé to’o domingu ró ne’ebé sei tula kombustível hosi ETO lori tonelada 2.700 no kuarta semana oin Pertamina International mós sei hatama kombustível maibé kona-ba kuantidade ami seidauk hatene,” Nelson de Jesus tenik.
Daudaun ne’e, postu abastamentu kombustível iha kapitál Dili iha 21, rua mak taka no 12 mak la fa’an gazolina ba ohin loron.
“Maibé aban sira bele hetan oportunidade hosi ETO lae Pertamina International hodi fa’an. Ita laiha probelma ho gazoel tanba sei barak hela. Empreza fonesedór Pertamina International no ETO rasik iha sira-nia armazen estoke menus tanba hetan difikuldade ró ne’ebé tula kombustível mai tarde tanba dalaruma ró atu tula kombustível ne’e antrian hela,” nia hato’o.
Jornalista : Arminda Fonseca
Editora : Julia Chatarina
