DILI, 07 juñu 2023 (TATOLI)—Estasaun kombustível iha kapitál Dili iha loron hirak ikus ne’e maioria taka tanba kauza estoke kombustível hotu.
Tuir observasaun Agência Tatoli iha terrenu, nota katak maioria estasaun kombustível ne’ebé taka simu mina hosi Pertamina International.
“Ohin ami taka ona tanba kombustível iha ne’e hotu ona, no kombustível ne’ebé supply mai ne’e hosi Pertamina Internasional maibé iha ne’ebá estoke hotu, tuir informasaun ne’ebé ami simu katak daudaun ne’e mina iha dalan,” Funsionáriu Pertamina Mega Petroleum Fatuhada, Nazario Ximenes, hateten ba Agência Tatoli iha Fatuhada, kuarta ne’e.
Notísia relevante : Folin kombustível iha estasaun iha mudansa kada semana
Nia dehan, loloos mina tama iha loron 05 juñu maibé tanba razaun laloran boot maka sei tama fali iha loron 09 juñu.
Iha sorin seluk, Jerente ba estasaun kombustível 99 fuel station Hudi-laran, Adelino Gonzaga, dehan, estasaun kombustível taka tanba estoke mina laiha.
“Ami durante ne’e foti kombustível hosi Pertamina International maibé daudaun ami taka tanba estoke mina mak hotu, maibé segunda semana oin hanesan ne’e ami bele loke fali ona tanba daudaun ne’e mina iha dalan mai ona, maibé to’o tarde tanba kauza hosi laloran boot,” nia tenik.
Ba kestaun ne’e, Jornalista Agência Tatoli tenta halo konfirmasaun ba na’in empreza Pertamina International maibé seidauk bele fó komentáriu tanba okupadu ho serbisu balun.
Estasaun kombustível ne’ebé daudaun taka mak hanesan iha Bebonuk, 99 99 Fuel Station Hudi-laran, 68 Fuel Station, Mega Petroleum Fatuhada, Mãe da Graça Fuel, no seluk tan.
Jornalista : Arminda Fonseca
Editora : Julia Chatarina
