DILI, 07 juñu 2023 (TATOLI)—Governu liuhosi Ministériu Obra Públika (MOP) sei halo lansamentu reabilitasaun estrada postu administrativu Laclubar to’o Soibada, munisípiu Manatuto, iha fulan-juñu ne’e.
“Ita sei halo lansamentu ba reabilitasaun estrada kruzamentu Laclubar to’o Soibada iha munisípiu Manatuto semana oin fulan ida-ne’e, tanba iha ona empreza manán-na’in no hetan vistu hosi Tribunál Kámara Konta,” Ministru Obra Públika, Abel Pires da Silva, informa ba Agência Tatoli iha nia knaar fatin, Caicoli, kuarta ne’e.
Nia dehan, bainhira Kámara Konta fó ona vistu signifika buat hotu la’o loos ona no hein halo lansamentu.
Notísia relevante : Governu prepara lansa projetu reabilitasaun estrada iha munisípiu tolu
Reabilitasaun estrada hosi postu administrativu Laclubar Vila to’o Soibada ne’e hetan ona aprovasaun hosi Konsellu Admnistrasaun Fundu Instraestrutura (KAFI) iha fulan kotuk, ho kustu projetu millaun $5 resin.
“Ida-ne’e hola parte susesu ida hosi VIII Governu nian tanba durante mandatu ne’e kona-ba estrada projetu barak mak ita lansa ona no daudaun la’o hela, balun agora iha dezeñu no balun Ajénsia Dezenvolvimentu Nasionál verifika hela no hein Governasaun foun mai mak kontinua,” nia tenik.
Projetu reabilitasaun estrada munisipál hosi kruzamentu Laklubar to’o Laklubar Vila ho distánsia kilómetru 10, enkuantu hosi Soibada Vila ho distánsia kilómetru 9.
Projetu ne’e toma-konta hosi empreza timor-oan ida halo konsórsiu ho empreza indonéziu ida.
Jornalista : Arminda Fonseca
Editora : Julia Chatarina
