Pertamina International garante estoke kombustível sufisiente
DILI, 07 juñu 2023 (TATOLI)—Sekretáriu Koorporativa no Reprezentante Legál Pertamina International, Rudolfo Sinambela, garante estoke kombustível sufisiente atu responde nesesidade públika no parseiru sira.
“Loos duni daudaun ne’e estasaun kombustível barak mak taka maibé ida-ne’e la’ós estasionamentu Pertamina International nian. Kona-ba kombustível iha Pertamina International daudaun ne’e seguru no la’o normál, ami kontinua distribui ba territóriu laran, espesialmente kontinua distribui ba ami-nia estabelesimentu kombustível hanesan iha Bobora no Becora, inklui estabelesimenu kombustível ne’ebé serbisu hamutuk ho ami,” Rudolfo Sinambela informa ba Agência Tatoli, iha nia knaar fatin, Pertamina International, Praia dos Coqueiro, kuarta ne’e.
Notísia relevante : Estasaun kombustível iha Dili taka tanba estoke mina hotu
Nune’e, nia husu ba públiku labele pániku ho estasaun kombustível balun ne’ebé daudaun taka tanba kombustível hotu.
“Pertamina International nia estoke iha armejen sufisiente hela, tanba hotu-hotu hatene Pertamina ne’e nu’udar fornesedór ne’ebé estoke labele mamuk. Ita husu ba públiku tenke hatene katak estasaun kombustível ne’ebé daudaun mamuk ka taka ne’e la’os Pertamina International nian hotu, maibé ida-ne’e dala-ruma fornesedór hosi empreza sira seluk tanba ida estasaun kombstível ne’ebé Pertamina International nian daudaun kontinua funsiona hanesan baibain, no lakleur tan ami-nia estoke atu to’o tan, ne’ebé situasaun la’o normál,” nia akresenta.
Pertamina International kontinua distribui estoke kombustível ne’ebé daudaun iha hela ba Dili laran, munisípiu sira inklui distribui nafatin ba kliente sira.
Jornalista : Arminda Fonseca
Editora : Julia Chatarina
