DILI, 07 juñu 2023 (TATOLI)–Prezidente Repúblika (PR), José Ramos Horta, kuarta ne’e, bolu Partidu Congresso Nacional Reconstrução de Timorense (CNRT) nu’udar partidu vensedór iha Eleisaun Parlamentár 2023.
“Prezidente Repúblika konvida ami mai hala’o enkontru informál tanba CNRT sai hanesan partidu vensedór ne’ebé bolu mai husu atu la’o hanusa, ne’e maka hotu-hotu mós kala hatene ona, Sekretáriu Jerál CNRT ba tiha ona sede PD ba ko’alia ona, iha loron ne’e mós PD sei hasoru Prezidente Repúblika, maibé atu dehan ne’e enkontru informál, kuandu formál loloos ne’e hafoin lejizlativa hosi Parlamentu Nasionál foun,” Prezidente Partidu CNRT, Kayrala Xanana Gusmão, informa hafoin ho estrutura partidu hasoru malu ho Xefe Estadu, iha Palásiu Prezidensiál, Bairru Pité.
Notísia relevante : PPN-PR diskute transferénsia lejislatura dalimak ba lejislatura daneen
Xanana Gusmão dehan, iha reuniaun ne’e sira mós husu kalendáriu pose ba lejizlatura daneen ba Xefe Estadu.
“Ami husu hela ba Prezidente Repúblika kona-ba kalendáriu, ne’ebé imi mós kala rona ona horiseik Prezidente Parlamentu Nasionál dehan presiza loron 15 ne’ebé to’o loron 22, buat sira ne’e hotu ne’ebé ita hein depois 22 juñu sesaun dahuluk iha Parlamentu, loron daruak sei iha eleisaun ba Prezidente Parlamentu no Komisaun sira, ne’ebé kona-ba formasaun Governu ne’e depois pose tiha lai ba lejizlatura daneen mak Prezidente bolu fali ami,” nia tenik.
Prezidente Partidu CNRT haklaken, bainhira lejizlatura daneen pose tiha no loron tuir-mai hili tiha meza PN no forma komisaun sira maka Prezidente bele bolu formalmente Primeiru-Ministru indijitadu.
“Se mak ne’e ita mós seidauk hatene, depois parlamentu funsiona tiha maka partidu maioria iha Parlamentu mak indijita Primeiru-Ministru, ohin ne’e bolu partidu mais votadu la’ós Primeiru-Ministru indijitadu,” nia fó hanoin.
Xanana admite, desizaun hotu iha ninia komprimentu no konfurmidade, tanba ne’e tenke halo tuir.
“CNRT rona mós katak lejizlatura daneen sei akontese iha setembru. Ida-ne’e CNRT la aseita, maibé durante previzaun iha rejimentu másimu loron-15.
Jornalista : Antónia Gusmão
Editora : Julia Chatarina
