DILI, 06 juñu 2023 (TATOLI)—Prezidente Parlamentu Nasionál (PPN), Aniceto Longuinhos Guterres, tersa ne’e, hala’o enkontru ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, hodi ko’alia kona-ba transferénsia hosi lejislatura dalimak ba lejislatura foun.
Notísia Relevante: PR Horta hakarak ajenda pose ba Deputadu foun iha juñu nia laran
“Ami ko’alia kona-ba transferénsia hosi lejislatura dalimak ba lejislatura danen, hanesan tuir rejimentu tenke hahu ho primeira reuniaun. Agora, atu realiza primeira reuniaun, ami iha interpretasaun diferentsa. Ha’u ho Prezidente Repúblika, biar diferensa tanba interrese Estadu nian prosesu sira bele la’o. Ha’u tuir de’it interpretasaun Prezidente Repúblika nian,” Prezidente Parlamentu Nasionál, Aniceto Longuinhos Guterres Lopes, hateten ba jornalista sira hafoin ramata enkontru ho Xefe Estadu.
Nia dehan, signifika iha loron 15 depois validasaun rezultadu eleisaun hosi Tribunál, prazu másimu ida-ne’e tenke realiza ona primeira reuniaun tuir prazu legál.
“Biar nune’e, ha’u sei ba konsulta lai líder bankada parlamentár atu fixa data fiksu dentru prazu legál ne’e,” nia hateten.
Aniceto Guterres hateten, interpretasaun diferensa tanba reuniaun dahuluk tenke akontese depois to’o lejislatura ne’e nia hun hotu, maibé tuir interpretasaun PR nian mak prazu loron 15 ne’e, nune’e nia parte tuir interpretasaun Xefe Estadu nian.
Jornalista : Nelson de Sousa
Editór : Cancio Ximenes
