VIQUEQUE, 08 juñu 2023 (TATOLI)—Autoridade Protesaun Sivil (APC, sigla portugés) apoia ona pakote emerjénsia ba vítima inséndiu uma, Martina Xavier ho ninia família sira iha aldeia Aidak Laran, suku Dilór, postu administrativu Lacluta, munisípiu Viqueque.
Xefe suku Dilór, Jacinto Ximenes, haktuir, bainhira akontese inséndiu, vítima nia sasán iha uma-laran la konsege salva.
“Parte APC lori ona pakote emerjénsia ba vítima sira hodi aguenta moris. Apoia hirak ne’e hosi APC, maibé parte Cruz Vermelha lori mai entrega ba ha’u-nia abitante Martina Xavier ho ninia membru família,” Autoridade suku informa ba Agência Tatoli, via telefónika, kinta ne’e.
Notísia relevante : APC rejista uma-kain 10 afeta ba dezastre naturál
Nia konta tuir, ahi han uma maizumenus tuku 05:30 dadeer iha loron 06 juñu 2023, bainhira vítima nono bee atu halo kafé, nia sunu aho no hatuur sanan iha ahi leten, vítima ba tiha kuru bee iha mota.
“Depois akontese ahi-han uma hodi rezulta sasán hanesan dapur, roupa hatais, labarik sira-nia livru, hare, batar no seluk tan ahi han moos,” nia akresenta.
Pakote emerjénsia ne’e kompostu hosi foos, mina, sanan, bika, supermi, sardina, terpal, dose biskuit no seluk tan.
Inséndiu uma ida ne’e ho kategoria estragu totál, ne’ebé iha membru família hamutuk haat iha uma-laran.
Jornalista : Vitorino Lopes da Costa
Editora : Julia Chatarina
