iklan

NASIONÁL, HEADLINE, POLÍTIKA

PM Taur entrega kopia relatóriu durante mandatu ba Xefe Estadu

PM Taur entrega kopia relatóriu durante mandatu ba Xefe Estadu

Primeiru-Ministru, Taur Matan Ruak. Imajen Tatoli/Egas Cristóvão

DILI, 09 juñu 2023 (TATOLI)–Primeiru-Ministru (PM), Taur Matan Ruak entrega ona kopia relatóriu durante mandatu VIII Governu nian, iha ámbitu reuniaun semanál ho Prezidente Repúblika (PR), José Ramos Horta.

“Ha’u aproveita biban entrega kopia relatóriu ida ba Prezidente Repúblika, difísil ita halo buat hotu durante tinan-lima iha surat-tahan oitoan nia laran maibé ideia jerál ne’ebé ami sente katak tenke inklui iha relatóriu ne’e, fó kopia ida ba Prezidente para bele hatene mós informasaun saida mak ami tau iha ne’ebá,” PM Taur hateten hafoin ramata reuniaun ho Xefe Estadu, iha Palásiu Prezidensiál, Bairru Pité, sesta ne’e.

Xefe Governu dehan, durante mandatu VIII Governu hasoru dezafiu barak hanesan instabilidade polítika no governativa.

“Ne’e hatudu katak iha oin partidu hotu-hotu labele hanoin halo krize de’it, tanba kuandu iha instabilidade polítika, ne’e iha instabilidade governativa, adia susesu nasaun nian, entaun ita hotu buka evita ida-ne’e,” nia fó hanoin.

Notísia relevante : PM Taur halo rezumu durante mandatu iha reuniaun KM ikus

Enkuantu, dezafiu seluk maka Timor-Leste iha pobreza multidimensionál 48,3%,  konta hosi setór tolu hanesan saúde, edukasaun no rendimentu sira.

“Agora halo nusa mak kombate ida-ne’e, entaun la’ós ida de’it ka rua de’it maibé presiza tempu investimentu barak iha area sira ne’e. Ita iha labarik má-nutrisaun 47%, inseguransa alimentár 36%. Dezafiu seluk mak dezempregu, antes ne’e dezempregu 11% maibé iha ha’u-nia mandatu redús ona 9,6%, no dezafiu seluk mak diversifikasaun ekonómika,” PM Taur preokupa.

Biban hanesan, Prezidente Repúblika husu ba Primeiru-Ministru, molok husik serbisu presiza hasoru malu lai ho Primeiru-Ministru injitadu.

“Prezidente Repúblika halo pedidu ida ba ha’u katak se bele ko’alia ho Primeiru-Ministru indijitadu ne’ebé sei mai, no ha’u prontu iha oportunidade saida de’it simu hodi ko’alia oitoan, la’ós de’it agora maibé depois tomada pose, se ha’u iha opiniaun ruma ha’u bele fó, ne’ebé ha’u dehan ba Prezidente Repúblika katak ha’u prontu,” nia tenik.

Nune’e, Taur mós informa ba Xefe Estadu katak, nia parte orienta ona membru Governu hotu atu labele husik sira-nia fatin kuandu seidauk iha subtitutu.

“Ha’u mós informa ba Prezidente Repúblika katak ha’u fó instrusaun ba membru Governu sira hotu para sira sai hosi sira-nia fatin serbisu sira kuandu sira simu ona sira-nia subtitutu, ita hatudu kultura foun ida, ita labele kaer soe hela de’it ita halai husik hela, nasaun ne’e la’ós ita-nia de’it, dependente ita-nia diverjénsia, problema polítika, nasaun ne’e ema barak terus, sofre, mate entaun respeita ba ida-ne’e,” nia adianta.

PM informa mós ba Prezidente Repúblika katak Governu hala’o ona reuniaun Konsellu Ministru ikus iha kuarta liubá, ne’ebé Governu preparadu loos simu Governu foun.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!