iklan

NASIONÁL, POLÍTIKA

PN halo preparasaun másimu ba pose Deputadu foun

PN halo preparasaun másimu ba pose Deputadu foun

Sekretáriu Jerál Adjuntu Parlamentu Nasionál (PN), Joao Rui Amaral. Imajen TATOLI, Nelson de Souas.

DILI, 09 juñu 2023 (TATOLI)—Sekretáriu Jerál Adjuntu Parlamentu Nasionál (PN), João Rui Amaral, hateten halo daudaun neé Parlamentu Nasionál halo preparasaun másimu ba serimónia fó pose ba Deputadu foun iha lejislatura daneen.

Notísia Relevante: PR Horta hakarak ajenda pose ba Deputadu foun iha juñu nia laran

“Ko’alia kona-ba preparasaun ba simu ita-nia Deputadu foun ba lejislatura daneen nian, preprasaun ne’e la’ós foin mak ami halo maibé ami halo fulan hirak liu ba tiha ona. Ne’ebé, foin daudaun iha sesta liu ba, ami iha reuniaun ida fila-fali atu hatene liután unidade ida-idak nia preparasaun ne’ebé mak sira halo atu hasoru ita-nia Deputadu foun sira-ne’ebé mak atu tama mai iha 22 juñu tinan ne’e, tuir data komferénsia lidér bankada deside,” Sekretáriu Jerál Adjuntu PN, João Rui Amaral, hateten ba jornalista sira iha nia kna’ar fatin PN, sesta ne’e.

Nia hateten, preparasaun másimu tiha ona hodi hein de’it loron pose ba Deputadu foun sira tama mai no iha kondisaun hotu preparadu atu simu.

“Giaun sira-ne’e ami hein katak, iha tempu badak, Prezidente Parlamentu Nasionál bele aprova ona, nune’e atu serbisu tuir buat ne’ebé trasa tiha ona,” nia hateten.

Tanba ne’e, nia parte seidauk bele fó sai kona-ba sekuénsia programa sira tanba sei hein aprovasaun giaun, no giaun ne’e mak sei regula hotu lala’ok reuniaun plenária dahuluk ba lejislatura daneen nian, to’o eleisaun Prezidente Parlamentu foun nian, kompozisaun meza, no komisaun sira.

Sekretáriu Jerál Adjuntu PN ne’e hateten, normalmente plenária dahuluk ba lejislatura foun ne’e sei konvida líder partidu polítiku sira-ne’ebé iha asentu Parlamentár ho sira-nia família, nune’e konvite sei sai.

Nia seidauk fó sai pose Deputadu foun ne’e akontese iha tuku hira tanba superiór sira sei deside, maibé nu’udar tékniku prepara tuir kondisaun ne’ebé sira-nia parte iha preparadu atu hala’o.

Antes ne’e, Sekretáriu Meza Parlamentu Nasionál, Lídia Norberta, informa Prezidente Parlamentu Nasionál, Aniceto Longuinhos Guterres Lopes, deside iha loron 22 fulan-juñu tinan ne’e sei realiza reuniaun plenária dahuluk ba lejislatura daneen.

Sekretária Meza PN ne’e dehan, desizaun ne’e PPN foti hafoin PPN realiza enkontru ho líder bankada parlamentár hotu hodi rona hanoin ba ajendamentu loron reuniaun plenária dahuluk ba lejislatura foun mai.

“Horsehik lorokraik reuniaun lidér bankada parlamentár hotu, hafoin rona tiha Deputadu hotu-hotu nia hanoin relasiona ho pasajen loron ka data monu ba saida, to’o ikus Prezidente halo desizaun ida katak 22 juñu, Semana rua mai tan, sei iha primeira reuniaun ba iha lejislatura daneen,” Sekretária Meza PN, Deputada Lídia Norberta, hateten ba jornalista sira iha uma fukum Parlamentu Nasionál, kuarta ne’e.

Bainhira Prezidente Parlamentu Nasionál hato’o tiha, nia dehan, desizaun ne’e iha lider bankada nota hosi bankada parlamentár hotu laiha ida mak objesaun ba desizaun ne’e.

“Signifika ida-ne’e loos ona iha dia 22 juñu sei iha pasajen hosi lejislatura dalimak ba lejislatura daneen,” nia hateten.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!