DILI, 09 juñu 2023 (TATOLI)—Postu abastesimentu kombustível ne’ebé simu kombustível hosi fornesedór Esperasa Timor Oan (ETO) no Pertamina International, hahú sesta ne’e, la simu ona komunidade lori masa boot sosa gazolina tanba kondisaun ne’e hamosu engarafamentu.
Antes ne’e, iha loron ikus ne’e komunidade barak mak lori masa boot hodi sosa gazolina iha postu abastesimentu kombustível tanba rona katak estock kombustível menus, maski autoridade kompetente informa ona katak semana oin situasaun la’o normál ona.
“Hahú ohin ita la atende komunidade ne’ebé lori jerigen (masa) boot mai atu enxe kombustível tanba sira mai korta de’it entaun hamosu fali engarafamentu no razaun seluk atu evita tanba bele mós sira mai sosa hodi ba fa’an fali iha li’ur hodi hasa’e folin, ho razaun ida-ne’e ita la simu,” Funsionáriu ETO, Nina Santos informa ba Agência iha postu abastesimentu kombustível ETO iha Hali-Laran.
Notísia relevante : ANPM konfirma semana oin estoke kombustível bele normál fali
Iha fatin ketak, Funsionáriu Pertamina International, Octávio, hateten, sira-nia parte fó sai ona avizu taka iha portaun iha postu abastesimentu kombustível Pertamina International iha Bebora.
“Ita taka ona avizu iha portaun, la simu komunidade mai enxe kombustível lori masa boot sira tanba hamosu engarafamentu, maibé tanba komunidade kontinua mai, ita husu ajuda Polísia Nasionál Timor-Leste (PNTL) mai apoiu, ita haruka fila komunidade ne’ebé lori masa mai,” nia dehan.
Tuir observasaun Agência Tatoli iha terrenu nota katak postu abastesimentu kombustível sira hetan seguransa másimu hosi autoridade seguransa.
Jornalista : Arminda Fonseca
Editora : Julia Chatarina
