VIQUEQUE, 19 juñu 2023 (TATOLI)—Uma-kain hamutuk 71 iha postu Lacluta, munisípiu Viqueque hahú asesu ona ahi eletrisidade desde kinta (16/06).
“Empreza halo instalasaun ba kada uma-kain sira ne’ebé durante ne’e la asesu ahi eletrisidade, liuhosi projetu eletrifikasaun nasionál pakote 44 ne’ebé implenta iha Rai Mutin, suku Dilor, área Nu-laran no suku Uma-tolu. Daudaun ne’e, ita-nia populasaun sira asesu ona ahi eletrisidade,” Supervizór Eletricidade de Timor-Leste, Empreza Públika (EDTL, E.P), Eduarto Sarment, hateten ba Agência Tatoli, iha postu Viqueque Vila, segunda ne’e.
Progresu implementasaun obra atinje ona 98%, nune’e ekipa EDTL, E.P halo ona teste ba transformadór ne’ebé instala ona ba uma-kain 71.
“Ami kontinua akompaña serbisu sira-ne’ebé empreza responsavél sira halo tanba balun seidauk hotu. Bainhira empreza halo hotu maka empreza entrega relatóriu ba ami,” nia akresenta.
Notísia relevante : Uma-kain 12.945 iha Viqueque asesu ona liña eletrisidade
Implementasaun projetu eletrifikasaun iha suku Dilor, Nu-laran no suku Uma-tolu ho distánsia liña MT 5,2 kms, implementa hosi empreza Ekdepurmaloi Unip,Lda. JV Peregrinas Unip,Lda ho montante kontratu $ 103.569,47, ho durasaun implementasaun serbisu fulan-neen.
Aleinde ne’e, progresu serbisu ba projetu eletrifikasaun iha Cararas ba Weluli-manas, daudaun ne’e atinje ona 34% no empreza sira kontinua serbisu.
“Foin lalais ne’e, ami-nia Inspesaun Tékniku e Verifikasaun Gestaun Projetu (G-ITVGP) halo ona monitorizasaun ba projetu eletrifikasaun nasionál pakote 13 iha Craras, Welulik-Manas, Bubur-laran, postu Viqueque Villa. Progresu implementasaun projetu eletrifikasaun nasionál pakote 13 atinje ona 31%. Empreza Tula Eli Unip,Lda.JV Waida Unip, Lda kontinua hatama materiál eletrisidade,” nia tenik.
Jornalista : Vitorino Lopes da Costa
Editora : Julia Chatarina
