Uma-kain 12.945 iha Viqueque asesu ona liña eletrisidade

VIQUEQUE, 04 janeiru 2023 (TATOLI)—Eletricidade de Timor Leste, Empreza Públika (EDTL, E.P) munisípiu Viqueque rejista uma-kain hamutuk 12.945 asesu ona liña eletrisidade.
“Iha tinan kotuk iha projetu dada eletrisidade ba suku ualu, nune’e suku haat ahi lakan ona no suku haat maka oras ne’e prosesu konstrusaun sei la’o hela no seidauk finaliza,” Diretór EDTL, E.P munisípiu Viqueque, Eduardo Sarmento, informa iha ninia knaar fatin, postu Viqueque Vila, kuarta ne’e.
Projetu dada eletrisidade iha suku haat ne’ebé seidauk finaliza konstrusaun maka hanesan Liaruka, Nahareka, Ahic no Laline, maibé daudaun prosesu la’o hela, bainhira konstrusaun atinje 95% mak EDTL, E.P sei halo lakan ahi eletrisidade, enkuantu suku haat ne’ebé asesu ona ahi eletrisidade mak hanesan Uaimori, Builo, Uaibobo no Uabubu.
“Hosi uma-kain ne’ebé asesu ona eletrisidade, ami monta ona pré-pagu ba uma-kain 8.776, enkuantu uma-kain 4.169 seidauk monta pré-pagu. Tempu badak ami sei instala pré-pagu ba uma-kain ne’ebé seidauk instala,” nia akresenta.
Notísia relevante: EDTL Viqueque Hetan Difikuldade ba Kombustivel
Durante ne’e EDTL, E.P enfrenta problema tanba dezastre naturál iha dezembru 2022, ne’ebé ahi eletrisidade iha postu Uatulari no Uatucarbau sempre mate lakan tanba anin no udan boot halo ai monu ba fiu leten.
“Entaun ahi eletrisidade mate, nune’e presiza tempu halo normalizasaun. Maski iha semana ida ba kotuk eletrisidade mate iha postu Uatulari no Uatucarbau, maibé ami kontinua esforsu hodi halo normalizasaun tanba natureza ninia hahalok. Ita la espera akontese, maibé bainhira akontese ami sempre buka normaliza,” nia tenik.
Funsionáriu ne’ebé serbisu iha EDTL, E.P munisípiu Viqueque daudaun ne’e hamutuk 32, kompostu hosi postu Uatulari iha haat, postu Lacluta iha ida, Ossu iha ida, Uatucarbau iha ida no postu Viqueqeu iha 25.
Jornalista : Vitorino Lopes da Costa
Editora : Julia Chatarina

