Deputadu foun tenke dignifika PN no sai defensór ba povu
DILI, 12 juñu 2023 (TATOLI)—Deputadu hosi bankada FRETILIN, José Paicheco no Deputadu hosi bankada KHUNTO, António Verdiál de Sousa, husu ba Deputadu foun mai iha lejislatura daneen ne’e tenke dignifika órgaun soberania Parlamentu Nasionál (PN) no sai defensór ba povu.
Notísia Relevante: PPN deside plenária dahuluk ba lejislatura daneen iha 22 juñu
“Semana ida-ne’e ultimu mandatu lejislatura dalimka nian, nune’e hato’o hela ba iha lejislatura daneen mai, ita-boot sira (Deputadu foun) bele dignifika Parlamentu ida-ne’e, mezmu iha diverjénsia polítika ne’ebé ha’u koko hato’o hela mensajen katak, ita halo menus buat ida hatun no hasai, nune’e ita bele hanoin ita-nia povu ne’ebé fó fiar ba ita-boot na’in rua (CNRT ho PD ne’ebé atu forma Governu dasia),” Deputadu José Paicheco hato’o liuhosi reuniaun plenária PN, segunda ne’e,
Buat seluk, Deputadu sira iha lejislatura foun mai ne’e ho prezensa másimu, tanba tuir observasaun sempre semana-semana halo justifikasaun entaun prezensa la másimu, povu fó ba deputaud sira mai atu diskute sira-nia moris.
Deputadu hosi bankada Governu ne’e hateten, semana ne’e termina lejislatura dalimak nune’e ba partidu CNRT ho PD ne’ebé atu forma Governu dasia ba kaer ukun hanesan Estadu atu rona asuntu povu nian.
Deputadu KHUNTO, António Verdiál de Sousa, hateten ohin loron ikus ita tama ona ba lejislatura ne’ebé atu termina ona ita nia mandatu hanesan Prezidente Komisaun G trata asuntu edukasaun hato’o agradesimentu ba deputadu sira seluk hamahan iha komisaun espesializada mezmu halo serbisu la alkansa buat hotu maibé iha serbisu di’ak tebes.
“Ba militante no simpatizante KHUNTO iha territóriu nasional, reprezenta deputadu na’in-lima iha uma demokrásia, karik ami-nia lian no karik imi-nia lian ami la hatutan ho sustentável iha uma fukun Parlamentu hodi hato’o deskulpa. Maibé, agradese ba povu hodi nafatin depozita konfiansa atu nune’e KHUNTO nafatin hetan kadeira lima iha PN,” nia hateten.
Hodi bankada KHUNTO mós husu deskulpa ba bankada parlamentár sira seluk durante hala’o kna’ar iha liafuan ne’ebé ladún kmanek karik, hodi bankada KHUNTO nia naran husu perdaun.
Nia husu Deputadu foun inklui nia parte atu tama mai iha lejislatura daneen hatur ida-idak nia aan ho loloos atu nune’e reprezenta duni povu Timor-Leste tanba instrumentu polítiku deputadu mai iha uma fukun PN hanesan ponte ida ho laran moos, tenke sai defensór ba povu hodi hala’o kna’ar loloos tuir mandatu konstituisionál halo lei, fiskalizasaun no halo desizaun polítika.
“Husu ita na’in-65 ne’ebé sei tama fila-fali mai iha Parlamentu Nasionál, ida-ne’e hatuur ita-nia an loloos hanesan deputadu reprezenta povu hodi defende povu ka sai defensór ba povu,” nia hateten.
Enkuantu, Prezidente Parlamentu Nasionál deside ona iha loron 22 juñu ne’e sei hala’o reuniaun plenária dahuluk ba lejislatura daneen ka pose ba Deputadu foun sira.
Jornalista : Nelson de Sousa
Editór : Cancio Ximenes
