DILI, 12 juñu 2023 (TATOLI)—Sekretaria Estadu Ambiente (SEA) liuhosi Diresaun Nasionál Biodiversidade husu públiku atu evita kasa animál fuik sira ne’ebé konsidera protejidu.
“Loos duni iha fulan kotuk viral iha rede sosiál ema kontinua oho animál protejidu sira, ida-ne’e ita husu ba komunidade tenke evita atividade ilegál sira ne’e tanba ida-ne’e fó impaktu ba animál fuik sira ameasadu atu lakon,” Diretór Nasionál Biodiversidade, Rui Pires, hateten ba Agência Tatoli iha nia knaar fatin, Bebora, tersa ne’e.
Notísia relevante : SEA komprometidu konserva ai-horis no animál protejidu
Nia dehan, durante ne’e parte SEA rasik halo esforsu atu kontrola kasadór sira labele kontinua kasa animál fuik sira inklui tesi ai arbiru, nune’e halo sosializasaun no tara bandu iha fatin-fatin atu evita maibé komunidade balun menus konsiénsia no kontinua kasa animál fuik no tesi ai arbiru.
SEA halo ona tara bandu iha suku hamutuk 100 iha territóriu laran.
“Ekipa SEA halo esforsu maibé ita-nia difikuldade mak transporte la sufisiente no agora ita mós iha ona regra karreta Estadu labele halo movimentu iha loron sábadu no domingu, entaun ida-ne’e difikulta tan ami karik iha fatin balun ema oho animál fuik sira no fa’an ita atu sai ba foti mós susar. Ami rekomenda ba Governu foun mai presiza fasilita SEA fó livremente, nune’e sá tempu de’it atu atende ba situasaun sira ne’e, tanba dala-barak ema kontinua halo atividade sira ne’e iha tempu fim semana,” nia akresenta.
Animál sira ne’ebé konsidera protejidu no presiza kuidadu mak hanesan loriku, kakatua, rusa, meda no seluk tan.
Jornalista : Arminda Fonseca
Editora : Julia Chatarina
