iklan

NASIONÁL, EKONOMIA, HEADLINE

Ekipa independente amerikana sujere Governu avalia fundu mina-rai kada tinan-lima

Ekipa independente amerikana sujere Governu avalia fundu mina-rai kada tinan-lima

Ministru Finansa, Rui Augusto Gomes. Imajen Tatoli /Egas Cristóvão

DILI, 12 juñu 2023 (TATOLI)–Ministru Finansa, Rui Gomes, hateten, ekipa avaliasaun independente amerikana, Mercer sujere ba Governu tenke halo avaliasaun ba fundu mina-rai Timor-Leste kada tinan-lima.

“Ekipa avaliasaun sira ne’e mai ona iha Timor no filafali ona. Sira halo ona entrevista dala liu 25, lee mós dokumentu liu 60 ho pájina hamutuk 10.000. Sira sei lee hela hodi halo avaliasaun no analiza ba dokumentu sira ne’e. Sira planeia atu realiza semináriu ida iha finál jullu 2023 hodi aprezenta rezultadu no loron 14 agostu 2023 maka sei aprezenta relatóriu finál, ne’ebé IX Governu mak sei kontinua. Sira seidauk fó relatóriu preleminariu ruma maibé sujestaun ida ba Timor-Leste maka presiza halo avaliasaun ba ita-nia fundu mina-rai ne’e kada tinan-lima. Ne’e sujestaun di’ak, hanesan mós fundu sira seluk mak fundu Nova Zelándia nian kada tinan- lima sira halo avaliasaun,” Ministru informa hafoin relata servisu ba Xefe Governu, iha Palásiu Governu, segunda ne’e.

Notísia relevante : Ekipa independente amerikana sei avalia fundu mina-rai Timor-Leste

Nia dehan, iha relatóriu ne’ebé sei publika sei kontempla aspeitu sira ne’ebé temi tiha ona, hanesan aspeitu governasaun fundu mina-rai ne’e rasik, investimentu kona-ba rekursu umanu no kona-ba operasionál sira.

“Ne’ebé aspeitu sira ne’e maka sira sei foka, iha reuniaun semana kotuk ha’u mós husu ba sira katak se bele karik kontempla mós senáriu rua, ida maka fundu mina-rai ho greater sunrise no ida seluk fundu mina-rai sein greater sunrise, ida-ne’e para ita mós hatene tanba nia aranju sira ne’e la hanesan, daudaun ita-nia fundu biliaun $18, signifika katak ita-nia jestaun ne’e di’ak no prudente,” nia tenik.

Ministru salienta, ekipa independente seidauk halo rekomendasaun no sei mosu iha relatóriu finál, ne’ebé sei hein, sira mós sei halo estudu ba dokumentasaun ne’ebé sira kolekta, sei verifika intemu video call ho entidade sira ne’ebé liga diretamente ho fundu mina-rai.

Ekipa ne’e kompostu hosi ema na’in-tolu, ne’ebé Governu Timor-Leste mak kontrata, pesoál hirak ne’e koñesidu iha mundu.

Ba kestaun ne’e jornalista tenta husu orsamentu ne’ebé gasta hodi halo avalliasaun fundu mina-rai, Ministru Finansa adianta katak sira sei informa filafali.

Jornalista     : Antónia Gusmão

Editora         : Julia Chatarina

 

iklan
iklan

Leave a Reply

iklan
error: Content is protected !!