DILI, 12 juñu 2023 (TATOLI)—Ró tula kombustível hosi empreza Esperansa Timor-Oan (ETO) atraka ona iha portu Hera, segunda dadeer ne’e.
“Mina kombustível to’o ona ohin dadeersan, gazolina hamutuk tonelada millaun 2,7, gazóleu tonelada millaun 3 no jet fuel litru 400.000 to’o ona Hera atu asegura kombustível ba Timor laran tomak,” Diretór Ezekutivu ETO, Nilton Gusmão, informa ba Agência Tatoli via telefónika.
Nune’e, Jerente empreza husu ba públiku atu labele pániku tanba durante ne’e kombustível la’ós laiha maibé estock mak menus, entaun presiza maneja atu asegura estoke labele mamuk.
“Husu ba públiku labele pániku tanba mina ne’ebé mai, normál bele aguenta ba loron 45 to’o 50 nia-laran, situasaun atuál estasaun kombustível barak mak laiha mina gazolina, sei tahan de’it ba loron-35 nia laran maibé ETO garante katak sei la falta gazolina tanba ró iha loron 29 juñu sei tula tan gazolina litru millaun 2, gazóleu litru millaun 2 no jet fuel litru 300.000 litru. Ho ida-ne’e situasaun mina atu falta ka menus ne’e sei la akontese tan,” nia garante.
Notísia relevante : ANPM konfirma semana oin estoke kombustível bele normál fali
Biban ne’e, Nilton Gusmão komprometidu hamutuk ho ekipa sei buka hadi’a servisu hotu, nune’e iha futuru mai situasaun hanesan agora labele akontese tan.
Iha sorin seluk, Diretór Diretór Downstream, Nelson de Jesus, hateten, nia parte no ekipa daudaun ne’e iha hela Hera halo observasaun ba prosesu diskargamentu kombustível ba tanke armazenamentu kombustível sira.
“To’o meudia sira ne’e karreta hosi estasaun kombustível sira iha Dili bele lori sai ona kombustível ba estasaun kombustível sira iha Dili laran,” nia tenik.
Tuir observasaun Agência Tatoli iha terrenu, nota katak maski daudaun ne’e kombustível tama ona maibé transporte públiku no privadu sira kontinua nakonu iha estasaun kombustível sira hodi sosa gazolina.
Jornalista : Arminda Fonseca
Editora : Julia Chatarina
