Karreta tula zinku UNP hetan asidente iha área Lugatohi Viqueque
VIQUEQUE, 12 juñu 2023 (TATOLI)-–Karreta fuzu ne’ebé tula zinku ba benefisiáriu programa Uma Naroma ba Povu (UNP) plus B iha postu administrativu Lacluta, munisípiu Viqueque, segunda ne’e maizumenus tuku 15:00 hetan asidente baku fila iha área Lugatohi, postu Viqueque Vila.
“Ohin ha’u bá haree, hosi asidente ne’e rezulta kondutór matan fukun maka hetan kanek. Karreta fuzu tula zinku hosi Dili atu bá postu administrativu Lacluta, maibé to’o iha área Lugatohi para iha dalan ninin parte liman karuk maka rai halai rezulta karreta monu ba rai naruk,” Xefe Tránzitu Polísia Nasionál Timor-Leste (PNTL) munisípiu Viqueque, Salvador Guterres, informa ba Agência Tatoli, iha postu Viqueque vila, segunda ne’e.
Notísia relevante : Karreta tula sasán merkadoria baku fila iha área Lauai Viqueque
Nia haktuir, karreta fuzu ne’e liu tiha dalan a’at Lugatohi hafoin kondutór (Sérgio de Jesus) para karreta kuaze metru 7 hodi nia ba haree traballadór xinéz sira aterru rai ba dalan a’at Lugatohi, haree hotu tiha kondutór fila bá atu halai karreta maka karreta fuzu xinéz nian hasoru, nune’e bainhira sira na’in-rua ko’alia hela maka karreta seidauk halai, derrepente rai monu karreta duir tun ba rai naruk kuaze metru 30.
“Nune’e zinko sira iha karreta laran monu sai hotu ba rai, daudaun karreta sei iha fatin akontesimentu, aban maka ami ba koordena ho sira hodi hasai karreta,” nia akresenta.
Iha fatin seluk, Diretór Planu Dezenvolvimentu Nasionál Suku (PNDS) munisípiu Viqueque, Higinio Posinato Zamor e Silva, hateten, karreta fuzu ne’ebé tula zinku hamutuk 3.750 atu lori ba postu Lacluta hodi distribui ba benefisiáriu uma-kain 36 iha suku Ahic.
“Karreta ne’e tula materiál zinku PNDS nian, maibé foin hetan asidente iha parte Lugatohi. Zinku balun sai a’at, ne’ebé aban maka ha’u informa ba direjente PNDS nasionál, karik zinku adisionál iha maka ita foin hatene desizaun,” nia tenik.
Tuir observasaun jornalista Agência Tatoli iha terrenu, nota katak daudaun ne’e karreta iha hela fatin akontesimentu no zinku espalla hela.
Jornalista : Vitorino Lopes da Costa
Editora : Julia Chatarina
