Loron mundiál infantíl, CNCTI rekomenda pontu haat ba Governu
OÉ-CUSSE, 12 juñu 2022 (TATOLI) – Prezidente Komisaun Nasionál Kontra Traballu Infantíl (CNCTI, sigla portugés), Aniceto Leto Soro, hato’o rekomendasaun haat ba entidade hotu liuliu Governu no Estadu persiza tau atensaun sériu ba asuntu forma aat traballu infantíl iha Timor-Leste.
“Hanesan komisaun Nasionál Kontra Traballu Infantíl, mak haree asuntu ida-ne’e, ha’u hakarak hato’o bazea ba rezultadu peskija, ha’u hakarak hato’o rekomendasaun ba hotu-hotu, primeiru husu ba ema hotu ne’e halo atendimentu ba Estadu, no parseriu nasionál internasionál no lokál sira, tenki tau priodade ba sira-ne’ebé vulneravél, fokuliu ba labarik sira-ne’ebé maka envolve iha forma aat hosi traballu infantíl,” Aniceto Leto Soro, ko’alia iha ámbitu komemorasaun loron mundiál traballu infantíl iha Oé-Cusse, segunda ne’e.
Rekomendasaun daruak, Governu tenke aprova planu nasionál kontra traballu infantíl, no lista atividade perigozu, ne’ebé ami submete ona ba iha Governu.
Rekomendasaun datolu, Governu persiza aumenta tán fundu transferénsia públika ho programa sira-ne’ebé maka liga ba bolsa da mãe ho montante adekuadu ba labarik sira-ne’ebé servisu, hodi rezolve pobreza no mós hasa’e nia rendimentu diáriu, nune’e lori labarik sira sai hosi servisu infantíl, hodi kontinua asesu ba edukasaun.
Rekomendasaun dahaat, persiza aumenta eskola, halo eskola públiku hot-hotu, inklui aumentasalariu ba profesór sira, uniforme inklui fasilidade eskola no seluktán.
Rekomendasaun ikusliu, maka persiza hasa’e konsiénsia ba inan-aman sira, no empregadór empreza sira, kona-bá impkatu negativu hosi forma aat traballu infantíl, persiza fasilita kréditu ba adultu sira, nune’e bele hasai sira hosi traballu infantíl.
Notísia relevante: ILO-UNICEF husu medida urjente hapara forma traballu infantíl iha Timor-Leste
Jornalista: Abílio Elo Nini
Editor: Evaristo Soares Martins
