Membru PN kontinua preokupa kombustível menus iha rai-laran

DILI, 12 juñu 2023 (TATOLI)—Membru Parlamentu Nasionál (PN) kontinua preokupa ho kombustivel menus iha rai-laran.

Notísia Relevante: Jerente ETO garante situasaun kombustível menus sei la akontese tan

“Ha’u foin mai iha dalan povu sira husu kombustível laiha ona ne’e ita ba ne’ebé, husu ba AIFAESA no ANPM atu tun ba iha baze hodi haree ema balun ne’ebé mak faan kombustível laiha tiha ona, maibé sei lori akua ida faan $10 la’o hela. Tanba kombustível mai ona sei ba iha ETO no ETO mak sei halo distribuisaun, maibé agora sei iha liu-liu mak masa ki’ik faan iha dalan,” Deputada CNRT, Maria Fernanda Lay, hateten liuhosi reuniaun plenária PN, segunda ne’e

Deputada CNRT, Maria Fernanda Lay, hanoin problema kombustível la’ós foin primeira-vés, Governu mak halo jestaun ladi’ak, hatene kombustível importa tenke mínimu estoke.

“Kona-ba mina estoke menus, bolu membru Governu mai para mai hatán,” nia hateten.

Deputadu FRETILIN, Antonio Bianco, hateten kombustível nian dala barak dun sala ba malu maibé hateke ba kotuk no liga esperénsia mundu nian.

“Iha mundu ne’ebé de’it sé mak garante kombustível, enérjia nasaun ida-nian ne’e tenke Estadu, tanba ne’e iha mundu ema nia kompañia Estadu toma konta asuntu kombustível no enerjia iha nia rai rasik. Ita-nia rai ne’e kontraditóriu dezde ukun-na’in sira uluk pois tuir mai iha tempu CNRT ka’er ukun tinan 10 ita depende ba kompañia estranjeiru Pertamina, depois ikus mai kompañia privadu ETO,” nia dehan.

Nia hateten, ohin loron TL depedénsia ba kompañia Pertamina no mós kompañia privadu ETO Timor-Leste, iha situasaun ida-ne’e hanoin TL tenke kuidadu no bainhira situasaun krize kombustível akontese iha situasaun seluk TL atu ba ne’ebé, atu garante ba oin Estadu mak tenke fó garantia.

“Ita labele garantia kombustível hosi kompañia privadu, ba futuru rezerva estratéjiku armajenamentu seguransa labele monu ba kompañia privadu iha situasaun ne’e ita dun malu. Ba oin, Timor GAP tenke asume responsabilidade atu garante kona-ba kombustível no enerjia ba povu Timor ne’e, labele hanesan agora ne’e, ita hanesan dun ba malu, ne’e erru desizaun uluk labele repete tan,” nia hateten.

Hatán ba ida ne’e, meza daudaun sei iha VIII Governu Konstitusionál nia responsabilidade no lejislatura dalimak mós seidauk hakotu nia mandatu, tanba ne’e relasiona ho situasaun kombustível akontese iha rai-laran, meza PN sei hato’o ka enkamina ba Governu atu halo óinsa hodi responde urjente liuliu menus kombustivel ne’ebé TL enfrenta.

Jornalista : Nelson de Sousa

Editór      : Cancio Ximenes