iklan

OPINIAUN

Oinsá Korrupsaun destroi Ambiente: Komprende Estudu Kazu kona-ba Korrupsaun Verde

Oinsá Korrupsaun destroi Ambiente: Komprende Estudu Kazu kona-ba Korrupsaun Verde

Hakerek-na'in: Higino Guterres

Introdusaun

Korrupsaun verde (green corruption) nu’udar krime finanseiru ne’ebé ameasa meiu ambiente no biodiversidade iha planeta mundu. Isu ida neʾe hahú diskute ona iha forum internasionál. Iha fulan dezembru 2022 liu­ba, realiza konferénsia internasionál anti-korrupsaun (IACC) ida iha Washington, nasaun barak partisipa no ba dahuluk ajenda no diskute hodi tau atensaun kona-ba kazu korrupsaun verde.

Iha ámbitu konferénsia neʾe, dada mos atensaun lubuk ida husi organizasaun internasionál sira, iha ne’ebé ezize estadu parte sira atu junta forsa no kolabora ho organizasaun konservasaun ambiente no ajénsia anti-korrupsaun sira iha mundu atu dezeña planu hodi identifika no halo mitigasaun ho rigór ba asuntu korrupsaun verde. Organizasaun internasionál ho naran Basel Goverance hamutuk ho Transparánsia Internasionál (TI) mak toka asuntu ida ne’e forte no sériu hodi konvense organizasaun sira iha mundu atu presiza luta makaas hasoru korrupsaun ambientál ne’ebé kauza no afeta ba destruisaun planeta.

Dezde tinan 2020 até resente, Institutu Basel Goverance halo hela estudu no peskiza beiebik hodi identifika no deskobre hahalok korrupsaun verde iha mundu. Peskiza sira ne’e foku ba nasaun sira ne’ebé iha indisius forte ba rísku korrupsaun verde nian, no mós ba nasaun sira ne’ebé lokaliza iha kosta sul, liu-liu nasaun sira ne’ebé poténsia iha rekursu naturál no nia populasaun sira identifikadu vulneravel.

Prátika Korrupsaun Verde

Artigu ida públika husi Institutu Basel Governance nian website iha inisiu tinan 2023 informa katak, fatór krítiku barak maka kauza korrupsaun verde no afeta ba degradasaun meiu ambientál iha mundu. Métade husi ai-laran ho hektar 420 iha mundu maka lakon ona husi tinan 1990 to’o 2020. Animál selvajen sira pursentu 69 maka lakon hafoin tinan 1970. Kintál pursentu 40 maka degragadu no afeta direta ba metade populasaun enfrenta konflitu relasiona ho rekursu naturál (TI, WWF, TRAFFIC, BG, 2023).

Atividade sira relasiona ho korrupsaun verde ne’ebé rísku liu iha mundu daudaun ne’e maka peska ilegál, deflorestasaun (tesi ai-laran no na’ok animál fuik sira), inklui negósiu lixu ilegál sira.  Hirak ne’e, barak liu akontese iha rejiaun kosta sul kontinente Afrika, Asia no Amerika do Sul, tanba konsidera riku iha rekursu naturál no risku liu, inklui mós nasaun balun iha Europa. Tuir peskiza sira ne’ebé iha relata katak, autór prinsipál sira ne’ebé prátika hahalok korrupsaun verde ne’e kuaze husi kompaña ka setór privadu sira, no balun servisu hamutuk ho governante sira.

Ezemplu kazu konkretu mak hanesan; iha China kazu kona-ba esplorasaun rekursu minerál ka gas, atividade peska ilegál ne’ebé opera iha America Latina, kazu seluk iha Indonesia kona-ba ekstrasaun ilegál ba aihoris ho eskalaun boot iha Kalimantan, iha Afrika kolleta ikan ne’ebé eksporta ba Amerika Sul la relata ba autoridade sira no akontese kazu subornu barak, (baselgovernance.org, 2023).

Peskiza ida halo husi Transparánsia Internasionál Bangladesh iha tinan 2020, foti amostra ba projetu infraestrutura ho adaptasaun klimátika husi tinan 2010 mai, halo estimasaun ba fundu projetu ho pursentu 35 mak halo iha nakukun laran no dezvia ba finalidade seluk. Kuaze projetu ho pursentu 80 maka implementa la di’ak, tanba kahur ho hahalok korrupsaun. Estudu kazu ida halo husi autor (Cortemiglia L. V. 2016), iha Italia relata katak, kada tinan montante billaun euro 10 maka kalkula lakon ekonomikamente husi produtu domestika ne’ebé kauza husi hahalok korrupsaun verde, no estudu kazu seluk halo husi autor (Hrynyk, Biletskyi, no Roux 2023) iha Ukraina tinan ne’e relata katak, ailaran kuaze millaun 3 mak estragus husi funu no estrasaun ilegál ba aihoris sira ne’ebé okupa husi Militar Rusia.

Prátika Korrupsaun Verde iha Timor-Leste

Maske iha Timor-Leste seidauk iha peskizadór ruma mak halo ona estudu kazu espesifiku ruma ne’ebé ko’alia kona-ba prátika korrupsaun verde durante iha independénsia ne’e, maibé esperiénsia Timor-Leste nian relasiona ho prátika destruisaun ambientál liga ho asuntu korrupsaun akontese ona tinan lubuk ida husi kolonializasaun portugueze no Indonezia mai. Ezemplu, entre tinan 1901-1926 kolonializasaun Portugeueze iha Timor-Leste na’ok mohu tiha aikameli hodi esporta ba sira nia rain pelumenus 700,00 kilogramas no ne’e la sura ho tinan sira antes (Da Silva, 2010).

Estudu ida halo husi peskizadór Japonese Miyazawa (2011) haktuir katak, Timor-Leste lakon ona zona florestál hektar 192,250. Tinan 1974, Timor rejistu 321,542 iha zona florestál, no bainhira Indonesia husik hela Timor iha tinan 1999, identifika katak, hela hektar 207,654 de’it. Militar Indonesia kuaze ho númeru 60.000 ate 120.000 durante operasaun militar hahú tinan 1975 até 1980 resin lori fila manu fuik oioin mak hanesan Lakateu, Pombu, Kakuak (matan-mean), Makikit, Lekirauk Rusa-fuik ba sira nian rain. Ohin loron, Kakuak, Makikit no Rusa-fuik sai animál sira ne’ebé konsideradu mohu ona ka lakon, (Da Silva, 2015).

Iha sorin seluk, Timor-Leste mós sofre prezuizu lubuk ida husi nia rikusoin mina no petroleum iha tasi Timor nian, hahu husi okupasaun Indonesia iha Timor no tinan inisiu ukun-an mai leten. Tuir relatóriu peskiza NGO La’o hamutuk nian revela katak, Timor-Leste  lakon nia rekursu petroliferu kuaze pursentu 40 ne’ebé na’ok ilegalmente husi guvernu Australiano, (laohamutuk.org 2020).

Estudu seluk maka relasiona ho kazu peska ilegál iha Tasi Timor hafoin independénsia. Bazeia ba estudu ne’ebé iha katak, dezde tinan 2006 to’o tinan 2015 deteta Ró hamutuk 59 maka kaer ikan ho ilegalmente iha tasi kosta leste no sul nian. Atividade peska ilegál ne’ebé halo iha tasi Timor mai husi nasaun Thailandia, China, no barak liu husi nasaun Indonesia. No tuir dadus ne’ebé relata husi autoridade kompetente sira katak, kada tinan Timor-Leste lakon millaun 36 ba ikan ne’ebé peskador ilegál sira na’ok (Fundasaun Mahein 2015).

Entertantu, tuir dadus seluk husi Ministériu Agrikultura no Peska (MAP) Timor-Leste nian ne’ebé fó sai iha notísia Timor-Post relata katak, tinan 2018, Ró peska ilegál hamutuk unidade 107 mak tama tasi Timór hodi na’ok ikan ho tonelada 223. Tinan 2019, MAP kontinua identifika Ró hamutuk unidade 67 mak tama iha tasi Timór halo atividade peska ilegál, ne’ebé ikan lakon hamutuk tonelada 100-resin.

Efeitu no Ameasa Sira

Atividade sira korrupsaun verde nian sai krítiku no ameasa ba dezenvolvimentu sustentável nasaun sira iha mundu, liu-liu nasaun sira semi perifera. Tuir haʾu nia hanoin, se bainhira nasaun sira iha mundu la tau atensaun koletivamente ba prevene aktu sira korrupsaun verde, liu-liu atividade peska ilegál no ekstrasaun aihoris sira. Ema vulneravel sira ne’ebé moris iha área afetadu iha zona kosteria no rurál, sira ne’ebé dependente ba rekursu naturál sei afeta ba krize hamlaha no dekadénsia naruk.

Alein ne’e, sei kauza eko-sistema sira nia moris la sustentavel, la saudavel, la seguru no kontinua mohu. Ameasa boot ida maka mundu enfrenta mudansa klimátika hodi lori ba destruisaun planeta. Mudansa klimatika nuʾudar problema globál ho nia impaktu ne’ebé boot ohin loron no destroi ambiente, sosiedade, ekonomia no komersiu iha politika. Impaktu ida ne’e dezafiu boot ne’ebé umanidade enfrenta iha mundu atuál, liu-liu ba nasaun sira neʾebe dezenvolve an hela (Рapa Francisco, 2015)

Relatoriu ida husi Intergovernmental Panel on Climate Change (IРCC) tinan 2023 relata katak, atividade umana, liu-liu emisaun ba gas husi efeitu estufa kauza inekivokamente akesimentu globál ho temperatura superfisie globál atinje sae ba 1,1°C husi tinan 2011-2020, kompara ho tinan 1850-1900. IРCC mos relata katak, ema besik billaun 3,3 to’o 3,6 maka moris vulneravelmente husi mudansa klimátika. Vulnerabilidade umana no ekosistema interdependente. Ema millaun ba millaun maka hasoru inseguransa alimentar no redusaun ba seguransa hídriku. Impaktu ne’e akontese ba país sira iha Afrika, Asia, Amerika Sentral no Sul. Entre tinan 2010 até 2020 ema mate tanba inundasaun, bailoron naruk no tempestadu dalas 15 aas liu iha rejiaun ne’ebé vulneravel liu, kompara ho rejiaun ne’ebé iha vulnerabilidade ki’ik, (IРCC, 2023).

Illa ki’ik sira, no nasaun sira ne’ebé depende ba setór agrikultura, ka nasaun iha rejiaun besik liu iha liña equadór (khatulistiwa) hanesan Timor­Leste, sai vulneravel liu ba impaktu husi mudansa klimátika (Lao Hamutuk 2020).

Junta Asaun Koletiva ba Mitigasaun

Рroblema korrupsaun no destruisaun meiu ambientál ne’ebé mensiona iha leten nuʾudar problema komum. Estadu hotu­hotu presiza junta forsa no servisu hamutuk hodi fortalese kapasidade no avansa ho vontade polítika ba prevene no kombate korrupsaun ne’ebé prezudika tebes ba dezenvolvimentu sustentável meiu ambiente, no ameasa ba vida umana ne’ebé moris depende ba rekursu naturál.

Luta ba moris diʾak komum nian ala justisa sosial no ambiental, labele separa problema korrupsaun husi meiu ambiente nuneʾe luta separadu iha ida idak nian nasaun. Presiza iha movimentu internasionál ne’ebé koletivu nforte, involve kamada hotu­hotu, tantu Guvernu, Sosiedade Sivil, Akadémiku Sira, Konfisoes Relijioza, Média no ema hotu­hotu. Nasaun hotu liu husi ajensia anti­korrupsaun no ajensia enviromentalizmu sira presiza estabelese rede global hodi hola misaun estratejiku ba prevene no kombate injustisa sosiál no injustisa ambientál ida neʾe.

Timor­Leste nuudar estadu neo liberal no nasaun ho klima sub­tropikál ne’ebé iha risku boot atu hasoru krize aihan no klimátika (bailoron naruk, udan la tuir tempu, inundasaun, rai manas nsst) ba tempu naruk. Estadu labele ignora asaun hotu hotu hodi salvaguarda nia rikeza sira. Estadu tenke ko’alia makaas ba korrupsaun no destruisaun hasoru ambiente. Ba kestaun ida ne’e, estadu tenke muda ona nia sistema politika ekonomia neo liberal neʾebe fraku tebtebes no hatuur paradigma politika ekonomia foun ho baze emansipasaun hodi halo kontrolu interna ida rigór ba atividade ekonomia nasaun nian, liu-liu esplorasaun rekursu naturál sira iha tasi, tantu rai maran ne’ebé esesivu liu ba ema oituan. Orgaun kontrolu sira anti korrupsaun nian tenke servisu hamutuk ho entidade nakait sira kria sistema kontrolu prevensaun ida efetivu ba rikusoin sira no mos nesesariu atu hatuur ukun fuan balun iha lei hodi kriminaliza hahalok ida neʾe. Sem ne’e, estimasaun ba futuru Timor­Leste bele monu ba estadu kleroptokasia.

Referensia:

  1. Cortemiglia L. (2016), Green corruption – More than “victimless” crimes, UNICRI, published.
  2. Silva A. B. (2015), Environmental Sustainability in Timor-Leste, TLSA.
  3. Hrynyk, Biletskyi, & Roux (2023), How corruption threatens the forests of Ukraine: Typology and case studies on corruption and illegal logging, Associated Institute of the University of Basel.
  4. Lao Hamutuk (2020), Hatene Impaktu Husi Atividade Umanu ba Mudansa Klimátika.
  5. Batts R. A, (2023), Internal controls and illegal wildlife trade: A systemic approach to corruption prevention and law enforcement integrity, Basel Governance.
  6. IРCC (2023), Synthesis Report of The IPCC Sixth Assessment Report (AR6). AR6 Synthesis Report: Climate Change 2023 — IPCC
  7. Australia Prosecuted Bernard Collaery and Witness K for 9 years (laohamutuk.org)
  8. Strengthen alliances to counter environmental corruption – new practitioners forum with Transparency International, WWF, TRAFFIC and the Basel Institute on Governance | Basel Institute on Governance (baselgovernance.org)
  9. The Washington Declaration, 20th International Anti-Corruption Conference (6-10 December 2022): Uprooting Corruption, Defending Democratic Values – IACC Series

 

 

 

iklan
iklan

Leave a Reply

iklan
error: Content is protected !!