Pagamentu ‘bolsa da mãe jerasaun foun’ fazeadamente ba benefisiáriu iha Covalima
COVALIMA, 12 juñu 2023 (TATOLI)–Pontu Fokál Bolsa da Mãe Jerasaun Foun, Nelson de Jesus, hateten pagamentu bolsa da mãe jerasaun foun ba benefisiáriu sira iha sentru saúde no postu saúde liuhosi kompañia mosan hala’o ho fazeadamente ne’ebé daudaun ne’e finaliza ona pagamentu iha sentru saúde Suai.
“Governu hala’o pagamentu ba benefisiáriu bolsa da mãe jerasaun foun, liuhosi kompañia tuir kalendáriu foin hahú postu administrativu Suai hala’o iha sentru saúde Suai Vila ne’ebé finaliza, hafoin kontinua iha postu saúde Suai Loro no postu sira seluk seidauk hahú,” Pontu Fokál Bolsa da Mãe jerasaun foun, Nelson de Jesus, informa ba Agência Tatoli, iha nia servisu fatin, Suai Loro, segunda ne’e.
Ho nune’e, pagamentu bolsa da mãe jerasaun foun foin hahú iha postu administrativu Suai no postu administrativu sira seluk seidauk hahú, tanba kompañia mosan halo pagamentu bazeia ba kalendáriu.
Dadus benefisiáriu bolsa da mãe jerasaun foun iha sentru saúde suai ne’ebé mosan halo ona pagamentu benefisiáriu hamutuk 158.
Tuir kalendáriu ne’ebé kompañia mosan hala’o pagamentu iha loron 6-17 fulan-juñu tinan 2023, hala’o pagamentu iha sentru saúde no postu saúde ne’ebé estabelese iha postu administrativu Suai.
Pagamentu ba benefisiáriu bolsa da mãe jerasaun foun, postu administrativu Maucatar sei hahú iha 19-22 fulan-juñu tinan 2023, iha loron 23-26 fulan-juñu iha sentru saúde no postu saúde ne’ebé estabelese iha postu administrativu Tilomar.
Iha sentru saúde no postu saúde ne’ebé estabelese iha postu administrativu Zumalai hahú iha loron 24-30 fulan-juñu no loron 1-4 fulan-jullu iha sentru saúde no postu saúde ne’ebé estabelese iha Fohorem sei hahú pagamentu iha loron 5-7 fulan-jullu tinan ne’e.
Sentru saúde no postu saúde ne’ebé estabelese iha postu administrativu Fatumea sei hahú pagamentu iha loron 10-12 fulan –jullu no sentru saúde Fatululik iha postu saúde Beidasi sei hahú iha loron 13-14 fulan-jullu tinan ne’e.
Entertantu, Governu hala’o abertura pagamentu bolsa da mãe jerasaun foun iha munisípiu Covalima iha sentru saúde Suai, munisípiu Covalima iha loron 6 fulan-juñu tinan 2023.
Jornalista : Celestina Teles
Editór : Cancio Ximenes
