Presu gazolina faan iha dalan-ninin, Aqua boot sa’e ba $5
COVALIMA, 12 juñu 2023 (TATOLI)–Relasioná estoke kombustível iha Postu Abastesimentu Kombustível rua mamuk iha Covalima, negosiánte kiik sira iha Covalima faan gazolina iha dalan-ninin ne’e, Aqua boot hosi presu $2 sa’e ba $5.
Notísia Relevante: Membru PN kontinua preokupa kombustível menus iha rai-laran
Morista Ojek, Lucas Cardoso Amarál, preokupa ho presu gazolina sa’e ne’e fó impaktu makaas atu hetan sira-nia rendimentu.
“Ami hanesan ojek defisil atu hetan rendimentu tanba ho presu kombustível ne’ebé sa’e hanesan Aqua boot antes ne’e ho presu $2 agora sa’e ona ba $5, nune’e ami defisil atu hetanrendimentu. Impaktu atu hetan rendimentu, tanba antes ne’e pasajeiru sira sa’e ojek selu ho $0,50 sentavus, maibé agora sira tenke selu $1.00,” nia dehan ba Agência Tatoli, segunda ne’e.
Pasjeiru Elisabet Namok hateten, sente triste tanba ho presu kombustível sa’e hodi fó impaktu mós ba pasajeiru sira sa’e ojek la’o dook no besik, tanba antes ne’e selu ho de’it presu $0.50 sentavus maibé agora sa’e ona $1.00 tanba presu kombustível sa’e.
“Ami hanesan parseiru hosi ojek mós sente triste ho presu kombustível fó impkatu ba ami, tanba ami ojek dook no besik selu ona ho presu $1.00,” nia dehan.
Tuir observasaun Agência Tatoli iha terreñu nota katak, negosiánte kiik sira-ne’ebé faan gazolina iha dalan ninin hahú hosi dirasaun Leogore to’o parte merkadu nian la hala’o atividade faan, maske parte área suku Camanasa mak faan maibe kada akua boot ho presu $5.
Aleinde postu abastesimentu kombustível iha munisípiu Covalima hanesan Global Fuel no mós Timor Gap laiha ona estoke kombustível iha semana kotuk kedas.
Jornalista : Celestina Teles
Editór : Cancio Ximenes
