DILI, 12 juñu 2023 (TATOLI) – Diretór-Jerál Administrasaun no Finansa husi Ministériu Edukasaun, Juventude no Desportu (MEJD), Antoninho Pires, informa saláriu ba profesór no dirijente eskolár sira sei hetan mudansa iha fulan-agostu.
Antoninho Pires afirma katak Konsellu Ministru aprova ona dekretu-lei ne’ebé atu halo mudansa ba saláriu kargu xefia no profesór sira iha territóriu. Lei ne’e hetan mós promulgasaun husi Prezidente Repúblika, José Ramos Horta.
Nia afirma bainhira dekretu-lei ne’e públika ona iha Jornál Repúblika, liu tiha fulan rua foin bele implementa. Nune’e, Ministériu Edukasaun garante katak iha agostu 2023 ne’e dirijente eskolár no manorin sira-nia direitu kona-ba saláriu sei hetan mudansa.
“Ha’u hanoin dekretu-lei ne’ebé foin hetan promulgasaun husi ita-nia Prezidente Repúblika iha semana hirak liu-bá ne’e ninia prosesu bele hein to’o agostu. Ita-nian dirijente kargu xefia no manorin sira bele hetan ona sira-nia direitu loloos kona-ba mudansa ba saláriu”, Antoninho Pires dehan, ohin, ba Tatoli, iha Vila Verde.
Responsavel ne’e esplika katak bá oin profesór no dirijente sira tenke buka halo ona ajustamentu ba dokumentu sira, tanba dekretu-lei ne’ebé hetan ona promulgasaun ne’e ninia prosesu hahú la’o.
Diretora Eskola Bázika Sentrál Farol, Filomena Fátima Freitas, hatete daudaun ne’e profesór sira ne’ebé asume kargu xefia nia saláriu entre $375 no $400 kada fulan, ba profesór permanente $266 no kontratadu $204.
Filomena Freitas agradese ba Governu tanba halo ona esforsu hodi hadi’ak moris ba nia emar sira iha setór edukativu atu hetan nesesidade sufisiente hodi kontinua tau-matan no garante kualidade alunu sira.
“Mudansa ba saláriu ne’e tanba ita-nia Governu nia esforsu. Ami profesór sira hato’o agradese ba ita-nia Ezkutivu, tanba bele hakmaan ona todan ne’ebé ami enfrenta durante ne’e. Fiar katak planu ministériu nian ne’ebé garante ona ba fulan-agostu katak kargu xefia no profesór sira sei hetan mudansa ba sira-nia saláriu ne’e bele sai duni realidade, nune’e labele lori de’it esperansa falsa ba manorin sira”, nia espera.
Rekorde katak Governu aprova, iha marsu ne’e, alterasaun ba Dekretu-Lei n. 23/2010, loron 9 fulan-dezembru, Estatutu Karreira Edukadór sira ba Infánsia no ba Profesór Ensinu Báziku no Sekundáriu (Estatutu Karreira Dosente nian).
Alterasaun ida-ne’e hakarak atu atualiza Estatutu Karreira Dosente hodi akomoda evolusaun no dezafiu sistema edukativu daudaun ne’e nian iha Timor-Leste, atu fó kontinuidade ba dezenvolvimentu rekursu umanu nasionál, hodi promove kualifikasaun profesór sira-nian no atu asegura katak hirak ne’e tenke koloka tuir nesesidade reál país nian.
Dekretu ne’e mós hakarak atu hametin valorizasaun karreira liuhusi sistema regulár sira atu halo verifikasaun (aferisaun) ba kompeténsia sira no prevee mekanizmu formasaun no avaliasaun dezempeñu nian ne’ebé bele garante kualidade sistema edukasaun no ensinu nian.
Aleinde ne’e, dekretu-lei ida-ne’e determina estabelesimentu sistema rekrutamentu ida ba dosente foun sira liuhusi kriasaun Bolsa Kandidatura sira-nian no kria rejime espesiál ida ingresu nian ba profisionál sira edukasaun nian ne’ebé dedika an ba ensinu no ne’ebé hetan ona abilitasaun mínima ne’ebé lei haruka hodi bele tama ba karreira.
Nune’e, alterasaun sira ba Estatutu Karreira Dosente ninia objetivu mak atu garante kualidade ensinu no profesór sira-nian, hodi promove meiu sira atu halo selesaun, verifikasaun no kolokasaun husi rekursu sira, bazeia ba méritu no profisionalizmu, no ho adaptasaun ba nesesidade nasionál sira.
Notísia relevante: Governu aprova estatutu karreira edukadór husi Ensinu Pré-eskolár to’o Sekundáriu
Jornalista: Tomé Amado
Editora: Maria Auxiliadora
