DILI, 13 juñu 2023 (TATOLI)—Reprezentante Rezidente Programa Nasaun Unida ba Dezenvolvimentu (UNDP, sigla ingles) iha Timor-Leste, Munkhtuya Altangerel hasoru malu ho Primeiru-Ministru (PM), Taur Matan Ruak, tersa ne’e, hodi despede tanba termina ona mandatu.
“Ha’u iha onra boot hasoru Primeiru-Ministru tanba ha’u-nia tempu iha ne’e ramata ona no ha’u sei sai hosi Timor iha loron 18 juñu tinan ne’e,” Munkhtuya Altangerel hateten hafoin hasoru malu ho Xefe Governu, iha Palásiu Governu.
Munkhtuya Altangerel hala’o kna’ar iha Timor-Leste durante tinan-haat, hahú iha loron 19 juñu 2019 to’o termina iha juñu 2023.
Notísia relevante : Empreza 22 sai manán-na’in ba programa kréditu suave hosi MTKI
Nia haktuir, iha hasoru malu ikus ne’e, aproveita rona Primeiru-Ministru nia avaliasaun kona-ba UNDP nia servisu ne’ebé hala’o ona durante ne’e.
“Ami iha buat importante tolu, ida maka durante ne’e pandemia COVID-19, hotu-hotu hela iha ne’e, UNDP hamutuk ho Nasaun Unida mantein hela iha Timor durante pandemia COVID-19 hodi apoia Governu kombate pandemia ne’e, nune’e mós apoia ba dezastre naturál ne’ebé akontese iha tinan 2021, iha ne’e UNDP nu’udar ajénsia internasionál dahuluk ne’ebé mak ajuda populasaun ne’ebé sofre hosi dezastre iha tempu ne’ebá,” nia relata.
Pontu importante datoluk maka UNDP halo kolaborasaun servisu ho Primeiru-Ministru no Ministériu Turizmu, Komérsiu no Indústria (MTKI) hodi fornese kréditu ba populasaun, liu-liu joven hodi halo negósiu.
“Primeiru-Ministru apresia tebes kooperasaun ho UNDP durante ne’e no orgullu ho susesu ne’ebé mak iha, mai ami ida-ne’e nu’udar onra boot,” nia dehan.
UNDP no Governu durante ne’e halo parseria hodi haree ba prospriedade povu nian, tanba ne’e servisu sira tenke kontinua maski kada Governu iha maneira rasik atu implementa ninia programa prioridade sira hodi lori moris di’ak ba ninia sidadaun.
Jornalista : Antónia Gusmão
Editora : Julia Chatarina
