VIQUEQUE, 13 juñu 2023 (TATOLI)—Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares Pinto, reprezenta Ministru Administrasaun Estatál (MAE), tersa ne’e, distribui sertifikadu apresiasaun ba xefe suku 36 inklui ekipa jestaun suku ne’ebé durante ne’e kontribui ba impelementasaun programa PNDS iha munisípiu Viqueque.
“Tuir loloos ministru mak mai distribui sertifikadu apresiasaun ba xefe suku sira, maibé ministru labele husik fatin to’o mandatu ramata, tanba ne’e ministru la mai no delega hela ha’u maka mai distribui sertifikadu ida-ne’e,” Diretora hateten iha serimónia distribuisaun sertifikadu ba xefe suku sira, iha sentru evakuasaun, tersa ne’e.
Notísia relevante : Kondisaun estrada difikulta projetu PNDS 383 iha Uatulari
Claudinha konsidera, autoridade suku, postu no munisípiu sira nu’udar autór ba implementasaun programa iha munisípiu Viqueque.
“Tanba ne’e ohin ami distribui sertifikadu ida-ne’e ba autoridade suku maka sai hanesan responsável no lidera jestaun suku sira tanba autoridade sira-ne’e desde inísiu kedas envolve iha prosesu ne’ebé sira apar ona ho programa sira,” nia akresenta.
Sertifikadu apresisaun ba xefe suku no ekipa jestaun suku asina diretamentu hosi Ministru Administrasaun Estatál, Miguel Pereira de Carvalho.
“Ami distribui mós sertifikadu apresiasaun ba funsionáriu PNDS ne’ebé durante ne’e fó sira-nia apoiu ba implementasaun programa,” nia tenik.
Iha serimónia distribuisaun sertifikadu, Diretora Claudinha Soares Pinto entrega ba Administradór munisípiu Viqueque, Januário Soares ‘Bolly’ hafoin entrega simbolikamente ba xefe suku Bibileo, postu administrativu Viqueque Vila.
Jornalista : Vitorino Lopes da Costa
Editora : Julia Chatarina
