DILI, 13 juñu 2023 (TATOLI)—Reprezentante Vátikanu iha Timor-Leste, Núnsiu Apostóliku, Monseñor Marco Sprizzi, hateten nia iha espetativa ba Governu foun mai implementa kompromisu sira-ne’ebé hato’o ona iha periódu kampaña eleitorál liuliu ba povu nia moris di’ak.
Notísia Relevante: CNRT-PD formaliza koligasaun forma Governu, Xanana Gusmão sai PM
“Ita iha espetativa boot ida-ne’e momentu importante istória Timor konsolidasaun no entusiazmu foun ba serbisu boot espesialmente iha ámbitu ekonómia, garantia serbisu iha ámbitu edukasaun, saúde no protesaun ba sira-ne’ebé frazil,” Monseñor Marco Sprizzi hateten ba jornalista sira iha Parlamentu Nasionál, tersa ne’e.
Reprezentante Vatikanu iha Timor-Leste, iha konfiansa tanba povu espresa liuhosi maneira demokrátika no pasífika.
“Ida-ne’e orientasaun klaru indikasaun ba nova maiória iha Governu no Parlamentu ba CNRT no mós koligasaun ho PD, entaun ita espera agora ita-nia konfiansa ba Parlamentu foun, ita-nia espetativa colabor de maneira frutuosa di’ak ba povu,” nia hateten.
Tan ne’e, reprezentante vatikanu iha konfiansa no sempre kolabora no suporta Governu ho Parlamentu no órgaun soberania sira seluk.
Aleinde implementasaun polítika ne’ebé sei realiza konforme kampaña eleitorál no konforme programa Governu sempre ho vizaun pasífika, fraterna, nune’e presiza hamutuk pozisaun tuir ida-idak nia tarefa hanesan hosi Governu no povu merese pas no unidade hodi realiza objetivu hodi mellora moris di’ak povu nian.
Jornalista : Nelson de Sousa
Editór : Cancio Ximenes