DILI, 14 juñu 2023 (TATOLI)—Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P) halo esforsu hodi implementa medida sira hodi garante kualidade produtu iha merkadoria, maski seidauk iha laboratóriu própriu.
“AIFAESA hasoru difikuldade tanba laiha laboratóriu atu deteta ai-han sira ne’ebé deskonfia kímiku, tanba ne’e tenke lori to’o bá rai-li’ur mak foin hatene rezultadu. Maski laboratóriu seidauk iha, maibé ekipa halo esforsu implementa medida hodi garante kualidade produtu ba ema, liu-liu produtu merkadoria ne’ebé ema atu konsumu, ami kontinua haree ema komersializa produtu,” Inspetór Jerál AIFAESA, Ernesto Monteiro, informa ba Agência Tatoli, iha ninia knaar fatin, Matadoro, kuarta ne’e.
Notísia relevante : AIFAESA,I.P presiza laboratóriu tipu-tolu hodi proteje konsumidór
Inspetór Jerál dehan, atu garante ai-han seguru iha Timor-Leste, daudaun ne’e AIFAESA, I.P kontinua kontrola ai-han inklui bebida sira ne’ebé prodús iha rai-laran inklui importasaun ne’ebé espalla iha merkadu lokál atu haree ninia kualidade, bazeia ba konstituisaun Repúblika Demokrátika Timor-Leste (RDTL) artigu 53 ne’ebé mensiona konsumidór sira iha direitu atu hetan ai-han ho kualidade di’ak.
“Liga ba dekretu-lei 26/2016 kona-ba AIFAESA rasik, iha artigu 16 mensiona seguru ai-han ba públiku, entaun durante ne’e ami-nia intervensaun atu hatene kualidade di’ak, nune’e tenke haree uluk ninia fíziku, mikrobiolojia no kímiku, maibé dutante ne’e ami haree liu mak ninia fíziku, signifika haree ai-han ne’e keta dodok, iis no a’at, tenke haree ho matan,” nia akresenta.
Nune’e, bainhira AIFAESA, I.P halo kontrolu fíziku mak hetan ai-han a’at, maka sei prosesa operadór ekonómiku ne’ebé komete infrasaun bazeia ba lei.
Nia fó ezemplu, bainhira operadór ekonómiku sira fa’an produtu liu prazu no la merese sai konsumu públiku nian, maka bainhira AIFAESA hetan tenke foti no aplika sansaun ba sira hodi responsabiliza ba aktu tanba iha ona lei ne’ebé regula atividade komersializasaun nian.
AIFAESA bainhira halo inspesaun ba atividade operadór ekonómiku, bazeia ba dekretu-lei numeru 26/2016 29 juñu, kona-ba atividade rejime infrasaun administrativa kontra ekonomia no seguransa alimentár, dekretu-lei numeru 23/2009 05 agostu, kona-ba regulamentu indústria no komersializasaun jéneru alimentísiu no dekretu-lei numeru 28/2011, kona-ba protesaun konsumidór inklui dekretu-lei nemeru 8/2016 08 jullu.
Jornalista : Arminda Fonseca
Editora : Julia Chatarina
