DILI, 04 abril 2023 (TATOLI)— Autoridade Inspesaun no Fiskalizasaun Atividade Ekonómika no Alimentár, Institutu Públiku (AIFAESA,I.P), presiza laboratóriu tipu-tolu atu garante kualidade ai-han hodi proteje konsumidór sira hosi produtu hotu ba konsumu nasionál.
“AIFAESA,I.P nu’udar instituisaun importante ba iha laboratóriu tanba atu garante kualidade ai-han hodi proteje konsumidór ho nune’e, AIFAESA,I.P presiza laboratóriu tipu tolu. Nee mak hanesan laboratóriu Metrolójia no Padronizasaun, mikro biolójia no kímiku,” Inspetór Jerál AIFAESA,I.P, Ernesto Monteiro dehan ba Agência Tatoli, iha nia-knaar fatin, Matadouro, Dili, tersa ne’e.
Nia isplika, AIFAESA,I.P presiza laboratóriu tipu sira ne’e tanba atu garante kualidade ai-han ba konsumu públiku no presiza duni laboratóriu. Tanba, kada laboratóriu sira ne’e ho ninia funsaun la hanesan.
Metrolojia no padronizasaun ne’e nia fungsaun mak atu proteje konsumidór sira liuliu ba iha kuantidade produtu sira. Katak konsumidór sira ba loja produtu sira ema tau ona folin no kuantidade, maibé dala ruma produtu sira ne’e konsumidór sira foti tetu presu dupla maibé kuantidade tun.
“Ba laboratóriu mikro biolójia ne’e atu halo teste ba produtu sira bainhira deskonfia ruma ita atu haree baktéria sira ne’e no kímiku nian mak ita atu haree ba ai-han sira ne’e iha kontaminasaun ho kímiku sira ne’e ka lae,” nia dehan.
“Ba laboratóriu mikro biolojia no kímiku nia konstrusaun iha ona no harii iha tinan 2011 iha Tibar. Maibé to’o agora seidauk iha ekipamentu atu bele asesu. Ita halo hela esforsu oinsá Governu polítikamente bele apoiu kona-ba laboratóriu ninia nesesidade kontrola merkadoria hodi proteje konsumidór sira,” Ernesto hateten.
Nia dehan, ba rekursu umanu AIFAESA,I.P iha ona ema tékniku professional ba laboratóriu hamutuk sanolu (10) resin no prontu atu servisu, maibé ekipamentu mak seidauk iha.
Ernesto hateten, durante AIFAESA,I.P laiha laboratóriu difikulta tebes sira-nia servisu tanba, bainhira sira halo inspesaun ba ai-han sira liuhosi fíziku deteta katak ladi’ak maibé laboratóriu miro biolójia no kímiku laiha no AIFAESA,I.P labele halo buat ida.
Antes ne’e, Embaixada Indonézia ka Kedutaan Besar Repubik Indonesia (KBRI) iha Timor-Leste,promote ona atu apoiu gratuita karreta laboratóriu movél ida ba AIFAESA,I.P maibé buat sira ne’e sei iha prosesu nia-laran.
“Ha’u konvida ona Badan Pengawas Obat dan Makanan (BPOM) Indonézia iha tempu badak sira sei mai vizita AIFAESA,I.P mak foin sira atu realiza komprimísiu atu apoiu karreta laboratóriu movel ne’e. Maibé sei iha prosesu nia-laran, ne’ebé bele akontese iha tinan ida ne’e, la’e tinan oin. Tanba sira mai ne’e sei observa lai,” nia dehan.
Jornalista : Arminda Fonseca
Editora : Armandina Moniz
