DILI, 14 maiu 2023 (TATOLI)-Autoridade Aduaneira (AA)/Alfándega arrekada reseita hamutuk $37.845.426,54 durante fulan-lima, hahú hosi janeiru to’o maiu 2023.
“Kolesaun reseita sira ne’e mai hosi pontu entrada sira hotu hanesan postu integradu fronteira Batugade, Salele, Aeroportu internasionál Comoro, no Portu Tibar rasik,” refere nota ne’ebé Agência Tatoli asesu hosi Ministériu Finansa, kuarta ne’e.
Notísia relevante : Portu Tibar rekolla ona reseita $648.000 to’o abríl 2023
Kategoria reseita kompostu hosi impostu importasaun hamutuk $14.517.962,90, impostu seletivu ba konsumu $14.925.631,76, no impostu fa’an $8.158.361,28.
“Reseita ne’e mós mai hosi kategoria penalidade sira ne’ebé rekolla hamutuk $184.103,55, kustu importasaun no esportasaun $36.76,03, no impostu Alfándega sira seluk mak $22.581,02,” nota ne’e ralata.
Foin lalais, Project Management Unit (PMU) Portu Baía Tibar fó sai relatóriu mensál to’o abríl 2023 ró karga hamutuk 83 ne’ebé atraka iha Portu Tibar fó rendimentu ba Governu liuhosi tarifa konsedente ka taxa navegasaun no taxa atrakasaun, inklui pagamentu pur tráfegu ka royalty taxes hamutuk $648.000.
Jornalista : Antónia Gusmão
Editora : Julia Chatarina
