Diretór Eskola Sekundária Hera husu MEJD investiga empreza Timorindo tanba la kumpre promesa
DILI, 14 juñu 2023 (TATOLI) – Diretór Eskola Sekundária Jerál (ESJ) Hera, António Pinto, husu Ministériu Edukasaun, Juventude no Desportu (MEJD), liuhusi Diresaun Nasionál Dezenvolvimentu Parke Eskolár (DNDPE) atu halo investigasaun ba empreza Timorindo tanba kontinua abandona konstrusaun edifísiu foun eskola refere.
“Iha loron 29 maiu 2023, kompañia Timorindo promete ona katak iha 05 juñu 2023 sira sei kontinua hikas konstrusaun ba eskola ESG Hera, nune’e molok agostu remata bele entrega ba Ministériu Edukasaun hodi halo inaugurasaun”, António Pinto dehan iha Vila Verde.
Nia salienta promesa ne’ebé empreza hato’o ba ministériu, liuhusi Diretór Nasionál Dezenvolvimentu Parke Eskolár ne’e seidauk realiza. “Agora, tama tan ona loron 14 juñu kompañia la orienta ninia traballadór sira atu mai kontinua obra ne’e. Edifísiu foun ne’e agora abandona totál”, katak.
Tanba ne’e, Diretór Parke Eskolár husu ba MEJD atu bolu urjente na’in ba empreza Timorindo hodi halo investigasaun ida porfunda. “Karik sira sei iha responsabilidade atu kontinua obra ne’e ka la’e, nune’e labele sakrifika fali profesór 34 no alunu 165 iha eskola refere”.
“Ami hakarak diresaun tenke halo duni investigasaun ba kompañia, nune’e ami bele hatene sira sei iha duni kapasidade atu kontinua konstrusaun eskola ne’e ka lae? Tanba ami sai vítima”, salienta.
Lembra karak estabelesimentu eskolár ne’e mota sobu tiha nia edifísiu ida no hariis-fatin iha tempu inundasaun iha 2021. “Agora, edifísiu ida seluk ne’ebé sei di’ak ne’e mós iha tan ameasa nia laran, tanba rai iha eskola kotuk laiha ona, besik tiha ona mota. Bainhira udan-boot lapara loron rua hanesan ne’e, bele sobu tan eskola”.
Tanba ne’e eskola garante tebes ba konstrusaun edifísiu foun ida ho sala aula rua ne’e bele hotu lalais hodi apoiu hikas prosesu aprendizajen ba alunu sira. “Maibé to’o agora eskola ne’e la hotu hela de’it, tanba ne’e tenke halo investigasaun ida hodi hatene loloos problema, nune’e bele foti desizaun ba kompañia ne’e”, salienta.
Rekorde karak empreza Timorindo ne’ebé abandona tiha konstrusaun antigu ESTV Hera, agora ho naran eskola sekundária jerál, durante fulan neen promete katak sei kontinua hikas projetu ne’e.
Diretór Nasionál Dezenvolvimentu Parke Eskolár, Agostinho Soares, antes ne’e haktuir katak Timorindo durante ne’e husik tiha ninia responsabilidade ba projetu konstrusaun ESTV Hera, tanba sira iha problema interna, maibé agora sira promete atu kontinua fali projetu ne’e.
“Ami la importa problema interna kompañia Timorindo nian, maibé ami hanesan projetu na’in ezije maka’as ba sira atu projetu ne’e tenke la’o, nune’e labele sakrifika fali Ministériu Edukasaun nomós estudante sira iha eskola refere, tanba durante ne’e ekipamentu ba eskola ne’e limitadu tebes”, Agostinho Soares afirma foin lalais ne’e.
Notísia relevante: Empreza Timorindo promete sei finaliza konstrusaun antigu ESTV Hera
Jornalista: Tomé Amado
Editora: Maria Auxiliadora
