DILI, 14 juñu 2023 (TATOLI) – Servisu investigativu edukasaun Ainaro no ekipa inspetór munisipál halo monitorizasaun ba projetu konstrusaun no reabilitasaun infraestrutura edukativa (PKRIE) ba Eskola Bázika Sentrál (EBC) rua ne’ebé lokaliza iha suku Manetu no Manelobas, tanba paradu fulan lima ona.
Diretór Servisu Edukasaun Munisípiu Ainaro, Óscar de Araújo, esplika katak desizaun ne’ebé nia foti hodi forma servisu konjunta ne’e atu akompaña prosesu PKRIE rua ne’ebé maka to’o agora labele la’o iha Ainaro, tanba impedimentu husi natureza.
“Iha Munisípiu Ainaro, iha área Manelobas no Manetu nian iha eskola EBC rua maka prosesu PKRIE to’o agora seidauk bele realiza tanba udan boot no mota tun maka’as, nune’e atu asesu estrada bá eskola refere kotu. Ha’u hatún kedan karta kooperasaun servisu ida ba ekipa investigativu edukasaun Ainaro, kompostu husi prezidente ho ekipa inspetór sira hodi tun ona bá terrenu halibur informasaun kona-ba asuntu ne’e”, Óscar de Araújo hatete via telefone.
Tuir nia, kooperasaun servisu hodi fó apoiu ba malu ne’e importante tebes, nune’e bele buka meius ida atubele rezolve problema sira maka akontese iha terrenu. Eskola sira ne’ebé maka Ministériu Edukasaun hatama iha planu ne’e atu fornese edukasaun ida adekuada ba nasaun nia futuru.
“Aban bá oin servisu edukasaun munisipál relata ona informasaun husi baze kona-ba situasaun iha terrenu, nune’e bele informa ba nasionál sobre situasaun ne’ebé akontese”, afirma.
Projetu ne’e hahú iha tinan kotuk, maibé tanba situasaun iha terrenu halo prosesu ne’e labele la’o ho di’ak. Eskola rua ne’e atinje ona 65% no tuir planu tenke finaliza iha fulan-agostu ne’e.
Notísia relevante: Ministériu Edukasaun muda sistema rekolla dadus PKRIE ba edukasaun munisípál
Jornalista: Tomé Amado
Editora: Maria Auxiliadora
