VIQUEQUE, 14 juñu 2023 (TATOLI)—Estudante na’in-439 iha Viqueque ne’ebé sai benefisáriu ba bolsa méritu hetan difikuldade trata dokumentu atu asesu ba programa Governu ne’e.
“Problema ne’ebé agora estudante sira enfrenta maka trata dokumentu hanesan kartaun Billete Identidade (BI), sertidaun moris no sertidaun hosi parte igreja maka kleur. Ho ida-ne’e maka prejudika ba ita-nia estudante bolsa méritu sira. Prosesu trata dokumentu ne’e kleur, bainhira estudante balun mai edukasaun ami haree sira-nia dokumentu la kompletu ami ajuda sira halo deklarasaun hodi lori ba parte notariadu Viqueque aselera sira-nia dokumentu hodi loke konta bankária,” Diretór Servisu Edukasaun munisípiu Viqueque, Domingos Brandão, informa ba Agência Tatoli, iha ninia knaar fatin, Beloi, kuarta ne’e.
Notísia relevante : MEJD husu dirijente eskola fasilita benefisiáriu bolsa méritu 138 trata konta bankária
Haree ba kestaun ne’e, maka inan amanhosi estudante sujere ba Servisu Edukasaun Viqueque atu halo pagamentu direta bolsa méritu.
“Ho preokupasaun hosi inan-aman estudante sira-nian hakarak halo pagamentu bolsa méritu direta ba estudante. Nune’e, foin lalais ha’u ba aprezenta ona iha Ministériu Edukasaun Juventude no Desportu (MEJD) maibé sira dehan katak laiha dalan atu ita halo pagamentu direta, pagamentu hotu tenke liuhosi konta bankária,” nia akresenta.
Aleinde ne’e, Diretór ne’e husu inan aman no Diretór eskola sira iha Viqueque atu loke nafatin oportunidade trata dokumentu tanba loron ikus iha 31 jullu 2023.
“Husu ba estudante no inan aman sira atu aselera trata dokumentu konta bankária hodi mai submente iha Servisu Edukasaun no ba nasionál hodi halo pagamentu, sekarik inan aman la trata estudante sira-nia dokumentu, munisípiu Viqueque sei hatama fali orsamentu $200.000 bolsa méritu ba kofre Estadu,” nia alerta.
Maski nune’e, estudante benefisiáriu na’in-482 bolsa méritu mak kompleta ona dokumentu no submete ona ba Banku Nasionál Komérsiu Timor-Leste (BNCTL, sigla portugés) no tama ona ba sistema.
Jornalista : Vitorino Lopes da Costa
Editora : Julia Chatarina
