DILI, 15 juñu 2023 (TATOLI) – Dosente hamutuk 104 husi Universidade Nasionál Timor Lorosa’e (UNTL) no husi Institutu Nasionál Formasaun Dosente no Profisionál Edukasaun Timor-Leste (INFORDEPE) sei fó formasaun akadémika, iha fulan-jullu, ba profesór 1.275 ne’ebé partisipa kursu baxarelatu.
Prezidente INFORDEPE, Manuel Gomes, hatete programa formasaun akadémika faze daruak ba profesór sira ne’etanba UNTL no INFORDEPE asina ona akordu kooperasaun iha 06 juñu liu-bá.
“Daudaun UNTL halo hela preparasaun kuandu laiha impedimentu iha jullu sira bele hahú ona formasaun akadémika”, Manuel Gomes dehan ba Tatoli iha Balide.
Nia esplika formasaun ne’e sei realiza iha kada munisípiu, tanba ne’e UNTL halo hela ajustamentu atu halo kolokasaun dosente tuir dixiplina sira ne’ebé maka atu fó ba manorin sira, inklui mós halo hela impresaun ba manuál sira atu distribui ba formandu ida-idak.
“Profesór ka dosente ne’ebé atu fó formasaun ba formandu ne’e kompostu husi UNTL na’in-40 no INFORDEPE 64”, realsa.
Tuir nia, formasaun ne’e sei hala’o durante tinan tolu tanba grau akadémiku ne’ebé formandu 1.275 tuir ne’e ba baxarelatu.
Nia salienta formandu sira ne’ebé partisipa formasaun akadémika ne’e foti husi profesór sira ne’ebé maka hanorin iha eskola bázika husi públiku no privadu, maibé sira-nia estatutu ne’e profesór permanente no profesór kontratu ne’ebé hanorin kle’ur ona.
Programa Ministériu Edukasaun nian hodi kontinua formasaun ba profesór sira ne’e atu kapasita manorin sira sai ema ne’ebé kualidade hodi bele apoia dezenvolvimentu edukasaun ida adekuada ba alunu sira iha territóriu.
Notísia relevante: Profesór 1.275 sei partisipa kursu baxarelatu iha UNTL
Jornalista: Tomé Amado
Editora: Maria Auxiliadora
