iklan

EDUKASAUN, HEADLINE

Profesór 1.275 sei partisipa kursu baxarelatu iha UNTL

Profesór 1.275 sei partisipa kursu baxarelatu iha UNTL

Prezidente INFORDEPE, Manuel Gomes de Araújo. Imajen Tatoli/Francisco Sony

DILI, 05 juñu 2023 (TATOLI) – Ministériu Edukasaun, Juventude no Desportu, Institutu Nasionál Formasaun Dosente no Profisionál Edukasaun Timor-Leste (INFORDEPE) no Universidade Nasionál Timor Lorosa’e (UNTL) kontinua formasaun baxarelatu ba profesór rihun 1.275 iha territóriu.

Dekanu Fakuldade Edukasaun, Arte no Umanidade (FEAH), Teodoro Soares, hatete kooperasaun ne’ebé INFORDEPE no UNTL halo iha ámbitu formasaun baxarelatu aseleradu ne’e, sei akumula profesór hamutuk 1.275. Formasaun ne’e sei hala’o ba manorin sira tuir kada munisípiu, tanba sira nu’udar profesór ein karreira labele husik hela sira-nia responsabilidade ba alunu sira.

“Formasaun ba profesór na’in-1.275 ne’e, ita sei konsentra iha kada munisípiu tanba sira ne’e nu’udar profesór ein karreira, labele mai tuir aula iha UNTL. Entaun, ita mak bá de’it hodi fó formasaun ba sira iha ida-idak ninia munisípiu”, Teodoro Soares ba Tatoli iha UNTL, segunda ne’e.

Nia dehan formasaun baxarelatu aseleradu ba profesór sira ne’e hatuur ona iha kontratu ho nia durasaun tempu ba tinan tolu. Kooperasaun entre INFORDEPE no UNTL hala’o dezde tinan hira liu-bá kotuk, maibé ba tinan ida ne’e demora uitoan tanba presiza hetan konkordánsia entre parte rua.

“Tanba ne’e maka iha ona desizaun hamutuk katak formasaun ne’e sei hala’o iha semana oin. Sei halo iha kada munisípiu, tanba ne’e tempu besik sei asina memorandu entendimentu ho kontratu programa. Depois ida ne’e bele hahú ona formasaun ba profesór sira”, katak.

Prezidente INFORDEPE, Manuel de Araújo, hatete antes madatu remata, profesór 9.080 ne’ebé seidauk hetan oportunidade sei partisipa formasaun iha área oioin. Husi númeru ne’e, sei sura hamutuk manorin 17.821 iha territóriu mak hetan ona formasaun.

“Formasaun ne’ebé la’o ona durante tinan ida hetan ona partisipasaun másima hosi profesór hosi nível ensinu báziku to’o sekundáriu, husi ne’e barak liu mak ensinu báziku. Husi formasaun kontínuo, ami konsege realiza ona ba profesór 2.940 iha konteúdu kurrikulár siénsia sosiál no ezata mak hanesan inglés no matemátika”, salienta.

Tuir planu no programa ba tinan oin, INFORDEPE hakarak loke tan formasaun kontínuo ba profesór 9.060, maibé depende ba orsamentu tanba daudaun la prevee verba ba formasaun refere.

“Ba formasaun akadémika iha profesór hamutuk 2.576 maka hetan ona graduasaun ho grau akadémiku baxarelatu iha Universidade Nasionál Timor-Lorosa’e”, nia akresenta.

Nia esplika mós katak sei iha profesór 3.386 ne’ebé seidauk hetan formasaun akadémika no seidauk hetan nível ho grau akadémiku baxarelatu. Ba tinan oin, INFORDEPE sei realiza tan formasaun akadémika faze daruak ba manorin sira ne’e.

“Ita-nia planu ba tinan 2023 hakarak realiza tan formasaun akadémika, maibé sei haree uluk akordu ho UNTL. Bainhira asina ona maka foin hatene loloos, atu nune’e sira bele tuir ona formasaun”, nia afirma.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!