Enkarregadu negósiu Austrália agradese PM no kompromete apoia governasaun foun
DILI, 15 juñu 2023 (TATOLI)–Enkarregadu Negósiu hosi Departamentu Negósiu Estranjeiru Austrália (DFAT, sigla inglés), Caitlin Wilson, kinta ne’e, hasoru malu ho Primeiru-Ministru, Taur Matan Ruak, hodi hato’o agradesimentu tanba durante mandatu halo ona koordenasaun serbisu di’ak tebes.
“Hasoru malu ho Primeiru-Ministru hanesan enkontru despedida, biban ne’e hato’o mós agradesimentu ba Primeiru-Ministru tanba durante ne’e halo kooperasaun serbisu ida di’ak tebes no buat barak mak atinje,” Caitlin Wilson hateten hafoin hasoru malu ho Xefe ezekutivu, iha Palásiu Governu.
Notísia relevante : Traballadór timor-oan serbisu iha Austrália hetan ona remesa millaun $200 resin
Caitlin Wilson afirma, Governu Austrália kompromete apoia Governu foun mai iha área saida de’it maibé presiza hatene uluk programa prioridade sira.
“Depois formasaun Governu foun, ami prontu atu apoia no halo kooperasaun nafatin. Apoia iha área saida de’it ami hein hasoru malu ho Primeiru-Ministru no Ministru ka Ministra Negósiu Estranjeiru Governu foun nian, ami prontu atu rona sira-nia prioridade sira hodi lori susesu iha mandatu,” nia subliña.
Aleinde ne’e, Austrália prontu kontinua apoia Governu iha mobilidade laborál iha rai-li’ur no programa bolsa estudu.
Biban hanesan, Enkarregadu hato’o mensajen hosi Primeiru-Ministru Austrália, Anthony Albanese, no Ministra Negósiu no Kooperasaun Austrália Penny Wong.
Governu Austrália durante ne’e apoia Timor-Leste iha área oin-oin hanesan dezenvolvimentu umanu espesialmente iha área saúde, dezenvolvimentu sosiál hanesan programa bolsa da mãe jerasaun foun. Apoia mós iha setór ekonomia hodi hametin no aumenta reziliénsia ekonómika iha nível nasionál no munisipál, agrikultura, infraestrutura no setór sira seluk.
Jornalista : Antónia Gusmão
Editora : Julia Chatarina
