Komunidade Aldeia tolu iha Beiseuk seidauk asesu bee-moos
COVALIMA, 15 juñu 2023 (TATOLI)–Komunidade suku Beiseuk aldeia Niquir, Fatuk-Metan no Wala, postu administrativu Tilomar, munisípiu Covalima seidauk asesu bee-moos ho di’ak, nune’e sira konsumu de’it bee matan antigu.
“Ami enfrenta problema hanesan la asesu bee-moos ho di’ak, tanba bee-matan antigu ida la sufisénte ba ami aldeia tolu hanesan aldeia Niquir, Fatuk-Metan ho Wala mak kuru de’it bee iha bee-matan antigu ida,” Komunidade Alarico da Silva hato’o ba jornalista sira iha aldeia Niquir, kinta ne’e.
Bee-matan antigu ne’ebé komunidade asesu hodi uza ba nesesidade dook hosi hela fatin, nune’e halo komunidade la’o ain kilometru ida foin bele kuru bee-moos
Tanba ne’e, komunidade husu ba Governu bele dada bee-moos tanba antes ne’e halo ona avaliasaun maibé to’o ohin loron laiha rezultadu halo komunidade kontinua halerik ba bee-moos.
Komunidade ho idade idozu, Gasimira Nunes, hateten nia parte labele la’o dook atu kuru bee-moos hodi uza ba nesesidade maibé nia tenke esforsu hodi selu de’it ojek atu tula bee-moos iha fatin dook hodi bele konsumu.
“Ha’u idade ona no labele la’o dook atu lalin bee-moos, nune’e ha’u seluk de’it ojek mak tula bee fó ha’u hodi uza ba nesesidade loro-loron,” nia dehan.
Nia selu ojek hodi tula bainhira hetan osan hosi faan nia animál sira hanesan Fahi no manu-lokál tanba pensaun ba idozolu tinan ida simu dala rua de’it.
Xefe Suku Beiseuk, Saturnino Cardoso Maia, klarifika nu’udar lider komunitária nia parte hato’o ona preokupasaun komunidade iha momentu ne’e, iha ona orsamentu atu dada bee-moos maibé kansela tanba la tama iha lista projetu A2.
“Ha’u hanesan lideransa komunitária hato’o ona preokupasaun no iha rezultadu hanesan iha ona orsamentu maibé hetan kanselamentu tanba la tama iha lista projetu A2 nune’e agora ha’u esforsu hela,” nia dehan.
Nia dehan, Cruz Vermella Timor-Leste (CVTL) dada ona bee-moos nune’e natoon ba komunidade no ladún susar atu asesu ba bee-moos, bainhira iha tempu bailoron hanesan fulan-outubru mak la’o dook tanba volume bee-menus.
“Ami tinan 2 la kuru bee-moos iha fatin dook tanba bee naton ba ami atu asesu maibé iha tempu bailoro mak ami kuru bee-moos dook uitoan bele la’o dook hanesan Komunidade aldeia Wala la’o kilo ida resin, Niquir la’o kilo ida no aldeia Fatuk-Metan la’o la to’o kilometru ida atu asesu bee-moos,” nia hateten.
Suku Beiseuk, postu administrative Tilomar, munisipiu Covalima ho nia aldeia sira hanesan Baer, Foho-Lulik, Niquir, Wala, Fatuk-Metan, Maubesi no Wetaba.
Jornalista : Celestina Teles
Editór : Cancio Ximenes
