Konfigurasaun meza PN ba lejislatura daneen sei deside iha konferénsia CNRT
DILI, 15 juñu 2023 (TATOLI)—Vise Bankada CNRT iha Parlamentu Nasionál, Deputadu Patrocínio Fernandes, hateten partidu CNRT sei realiza konferénsia nasionál mak bele deside konfigurasaun meza PN ba lejislatura daneen.
Notísia Relevante: CNRT no PD aseita ho kalendáriu sesaun dahuluk lejizlativa foun
Nia hateten, tuir lei partidu polítiku koligasaun antes ka depois, rekezitu ida mak tenke halo konferénsia no konferénsia mak sei deside halo koligasaun ka la’e ho [partridu] sé, komunikasaun sira la’o hela públiku akompaña iha sinál koligasaun entre CNRT ho PD atu forma Governu dasia.
Maibé, nia dehan, CNRT seidauk halo konferénsia atu deside koligasaun oinsá, tanba rezultadu eleisaun parlamentár ne’e hatudu katak iha partidu lima mak hakat liu barreira iha Parlamentu Nasionál, ne’ebé komunikasaun ne’ebé la’o hela mak agora CNRT ho PD.
“Buat ida mós importante ba ita-boot sira atu hatene, CNRT seidauk halo nia konferénsia atu deside. Mezmu komunikasaun informál sira la’o tiha ona no vizita malu, la’o hamutuk ba hasoru Prezidente Repúblika, maibé buat ne’ebé lei haruka koligasaun pre-eleitorál ka post-eleitorál tenke iha konferénsia ruma, deside desizaun sira-ne’e koletiva kumpre ba estatutu no prosedimentu. Ami, talves iha 19 juñu foin realiza ami-nia konferénsia nasionál, ne’ebé hein dinámiku polítiku saida mak sei akontese. Hanoin so ita hakat liu tiha prosesu sira-ne’e mak foin bele ko’alia kona-ba konfigurasaun meza Parlamentu Nasionál ninian,” nia hateten ba jornalista sira iha PN, kinta ne’e.
Nia hateten, tempu sei sufisiente ko’alia kona-ba konfigurasaun meza PN ba lejislatura foun, mezmu hela de’it ona semana ida atu ramata lejislatura dalimak nian no reuniaun dahuluk lejislatura daneen ka pose Deputadu foun sei akontese iha loron 22 juñu ne’e.
“Hanoin tempu ne’e sei sufisiente hodi konsolida bele hetan kona-ba konfigurasaun meza ida forte atu asegura, fó sustenta govenasaun durante tinan lima nia laran bele to’o ba iha povu nia espetativa,” nia hateten.
Tanba ne’e, Deputadu Patrocínio lakohi komenta uluk kona-ba iha ona kandidatu forte, koligasaun sei ba ho pakote úniku ka oinsá no pasta ba Prezidente Parlamentu Nasionál ho nia kompozisaun hanesan vise-prezidente ho sira seluk asume hosi kandidatu partidu se-sé, tanba sei hein faze tuir mai hodi hein, hafoin konferénsia nasionál.
Notísia Relevante: CNRT no PD halo ona komunikasaun polítika
Jornalista : Nelson de Sousa
Editór : Cancio Ximenes
