MTCI Covalima sei kontrola presu foos sa’e iha merkadu Debos
COVALIMA, 15 juñu 2023 (TATOLI)–Funsionáriu Ministériu Turizmu Komérsiu no Indústria (MTCI) Covalima, Vitrico Brito da Silva, hateten Ministériu Turizmu Komérsiu no Indústria (MTCI) kontrola presu foos sa’e iha merkadu Debos, postu administrativu Suai, munisípiu Covalima.
Notísia Relevante: Komunidade Covalima preokupa presu foos $12 sa’e ba $16
“Ami sempre kontrola presu foos iha merkadu hodi foti dadus hanesan iha fulan kotuk, presu foos normál hafoin ami relata dadus ba Dirasaun Nasionál. Maibé, presu foos foin mudansa iha fuan-juñu ne’e, entaun iha tempu badak ami sei kontrola,” Vitrico Brito da Silva hato’o ba Agência Tatoli iha nia kna’ar fatin, kinta ne’e.
Atu kontrola presu foos iha merkadu, MTCI serbisu hamutuk ho CLN tanba mudansa presu foos iha merkadu la’ós akontese iha rai-laran de’it, maibé mai kedas hosi estranjeiru.
Ho presu foos la normál ne’e, funsionáriu MTCI sei kontrola iha tempu badak maibé hasoru difikuldade tanba menus rekursu umanu.
Razaun hasoru difikuldade tanba funsionáriu MTCI iha Covalima, na’in-ida de’it mak halo kontrolu ba presu foos iha merkadu vila ba to’o postu administrative sira iha Covalima.
“Ita hatene funsionáriu na’in-ida de’it la sufisénte tanba kontrola presu to’o iha postu administrativu sira, nune’e presiza atu halo rekrutamentu,” nia dehan.
Tanba ne’e, nia husu atu halo rekrutamentu ba funsionáriu na’in-tolu (3) nune’e bele halo kontrolu másimu presu foos iha merkadu sira iha vila no postu administrativu sira-ne’e.
Antes ne’e, komunidade iha Covalima hato’o ona preokupasaun kona-ba presu foos ne’ebé sa’e iha merkadu kilograma 25 hosi $12 sa’e ba $16.00.
Loja-Na’in Arumi, Domingas de Jesus, klarifika loja sira hasa’e presu foos iha merkadu la’ós, tanba sira-nia hakarak maibé mudansa presu foos iha nasionál hanesan sira sosa foos kilograma 25 ho presu $15.00, entaun faan iha Suai ho presu $16.00.
Jornalista : Celestina Teles
Editór : Cancio Ximenes
