DILI, 15 juñu 2023 (TATOLI)—Organizasaun mundiál hanesan Programa Ai-han Mundiál (WFP, sigla inglés) no Organizasaun Nasaun Unida ba alimentasaun no Agrikultura (FAO, sigla inglés) husu ba Governu hodi kontinua investe iha setór agrikultura ne’ebé sustentável hodi hasa’e produsaun lokál nune’e bele garante seguransa ai-han iha Timor-Leste.
Reprezentante FAO iha Timor-Leste, Paula Lopes, hateten, sira-nia parte hanesan ajénsia internasionál ne’ebé haree liu ba seguransa ai-han, durante ne’e servisu hamutuk ho MAP hodi fó asisténsia téknika iha área agrikultura no setór sira seluk.
“Durante ne’e ita sevisu hamutuk ho MAP hodi promove agríkola inklui fó asisténsia téknika ba agrikultór sira bele hatene risku dezastre naturál no fó asisténsia téknika kona-ba melloramentu sistema kultiva ninian,” Paula Lopes, hateten iha salaun Delta Nova, kinta ne’e.
Notísia relevante : WFP apoia Governu TL mellora programa merenda eskolár ba eskola 400
Aleinde ne’e, FAO mós fornese informasaun ba ekipa MAP kona-ba utilizasaun sistema agríkola ekolojikamente ho loloos no FAO durante ne’e servisu maka’as promove no garante seguransa ai-han iha Timor-Leste.
“Ita espera ho asisténsia téknika ne’ebé ita fó ona ba agrikultór sira durante ne’e bele hasa’e produsaun lokál iha kolleta hodi hamenus númeru má-nutrisaun iha Timor-Leste, tanba FAO sempre fó advokasaun hodi garante katak Govenu realiza intervensaun integrada hodi intensifika kultivu lokál,” nia akresenta.
Tuir Paula Lopes, asuntu ne’e presiza iha kooperasaun integrada di’ak ba sistema agríkola hanesan fornesimentu ba planta di’ak, irrigasaun di’ak, asesu transporte ba merkadu di’ak no seluk tan.
“Ita apoia orsamentu millaun $2 ba MAP kada tinan hodi intensifika produsaun lokál inklui fó asisténsia téknika iha Timor-Leste,” Reprezentante organizasaun tenik.
Iha fatin hanesan, Diretora Nasionál WFP, Alba Cecília Garzon Oliveira, hateten, ekipa hosi organizasaun mundiál ne’e halo hela analiza prisípiu no kestaun ne’ebé mak bele suporta nasaun liuhosi seguransa ai-han.
“Daudaun ne’e ami rekolla hela informasaun kona-ba kestaun seguransa alimentár, nune’e hodi informa ba Governu foun mai oinsá tau orsamentu naton hodi hasa’e produsaun lokál iha nasaun ida-ne’e,” nia dehan.
Alba Cecília nota, Governu Timor-Leste tinan ne’e disponibiliza 2% hosi Orsamentu Jerál Estadu ba setór agrikultura no peska, maibé orsamentu ne’e la sufisiente hodi foka efetivamente hasa’e produsaun lokál no nasionál.
“Ita hatene, iha Timor-Leste populasaun 48% liu moris kiak, ho ida-ne’e Governu tenke aloka orsamentu sufisiente hodi hasa’e produsaun lokál ne’ebé garante katak populasaun hotu bele konsumu, nune’e bele hamenus númeru má-nutrisaun iha Timor-Leste,” nia reforsa.
WFP hamutuk ho organizasaun dezenvolvimentu sira seluk to’o tinan 2022 fó ona apoia orsamentu hamutuk millaun $140 hodi suporta agrikultura iha Timor-Leste inklui setór sira seluk.
Jornalista : Arminda Fonseca
Editora : Julia Chatarina
