DILI, 16 juñu 2023 (TATOLI)–Ministru Obra Públika, Abel Pires da Silva, informa, ekipa responsável Ajénsia Dezenvolventu Nasionál (ADN) halo hela diskusaun no verifikasaun ba dezeñu ponte foun Bekusi molok loke konkursu públiku.
“Sira verifika lai para hatene kustu hira, nune’e bele loke ba konkursu ona. Bainhira tama ona ba verifikasaun ha’u fiar katak fulan ida ka rua nia laran ne’e bele ona hahú lansa prosesu konkursu ba ponte Bekusi,” Ministru hateten hafoin serimónia lansamentu fatuk dahuluk ba reabilitasaun estrada Laclo, ne’ebé hala’o iha aldeia Obrato, suku Sau, postu administrativu Manatuto Vila, munisípiu Manatuto, sesta ne’e.
Notísia relevante : Konstrusaun ponte provizóriu Becusse atinji ona 80%
Daudaun ne’e harii ona ponte temporária Bekusi hodi asegura movimentu transporte no ema iha ponte Bekusi
“Hanesan baibain ha’u deklara bebeik katak movimentu transporte iha ne’ebá ne’e la’o normál hela, entaun laiha urjénsia, ne’ebé Governu foun mai mós molok atu halo liuhosi prosesu normál,” governante ne’e akresenta.
Ministru Abel dehan, Govenu foun mai bele kontinua prosesu tuir mai hodi hari ponte permanente ida.
“Ida-ne’e mak ita-nia prosedimentu, maibé Governu agora la husik hela problema tanba problema inundasaun rezolve tiha ona no agora ponte temporária mós funsiona di’ak hela no ponte foun mai mós funsiona nafatin ho ida agora,” nia tenik.
Antes ne’e, ponte Bekusi hetan estragu kauza udan-boot no inundasaun ne’ebé akontese iha loron 04 abríl 2021.
Nune’e, iha loron 06 abríl 2021, Primeiru-Ministru, Taur Matan Ruak, halo vizita hodi haree kondisaun ponte Bekusi no iha momentu ne’eba kedan fó orientasaun ba Vise Primeiru-Ministru no Ministru Planu Ordenamentu, José Reis no Ministru Obra Públika sesante, Salvador Eugênio Soares dos Reis Pires, hodi sobu ponte tuan hodi harii ponte foun, nune’e labele fó impaktu negativu ba populasaun ne’ebé hela besik mota bainhira akontese inundasaun.
Governu prevee orsamentu ba estudu no dezeñu ponte Bekusi hamutuk $100.000 no ba kontrusaun ponte foun $500.000.
Daudaun ponte temporária Bekusi funsiona hela ho naruk maizumenus metru 20, ne’ebé uza materiál hosi ponte masin ho nia todan tonelada 50. MOP disponibiliza $90.000 ba konstrusaun ponte temporária ne’e.
Ponte Bekusi tuan harii iha loron 15 novembru 2016 no ramata iha loron 31 jullu 2018 ho kustu hamutuk $674.456,62.
Jornalista : Antónia Gusmão
Editora : Julia Chatarina
