VIQUEQUE, 15 juñu 2023 (TATOLI)–Programa Asembleia Nasionál ba Country Coordinating Mechanism (CCM), kinta ne’e, halo avaliasaun ba funsionamentu Servisu Saúde munisípiu Viqueque.
Fiskalizadór CCM, Danina Coelho, hateten, avaliasaun sei halo ba servisu tolu ne’ebé daudaun ne’e sei implementa iha munisípiu Viqueque hanesan HIV-SIDA, TBC, no malária, ne’ebé finansia hosi Fundu Globál. CCM halo fiskalizasaun ba implementasaun Fundu Globál iha Timor-Leste tanba daudaun implementa programa liuhosi Ministériu Saúde.
“Nune’e ohin loron ekipa saúde halo screaning ba moras tuberkoloze, espera ita bele rekupera tanba Governu iha kompromisu hakarak deklara Viqueque iha tinan 2024. Hosi atividade sira, Fundu Globál ne’ebé CCM apoia ba Ministeriu Saúde siklu 2021-2023 ne’e hamutuk millaun $15,7 ba programa HIV-SIDA, malária no TBC,” Fiskalizadór informa ba Agência Tatoli, iha salaun Tilou, Viqueque vila.
Notísia relevante : Kombate moras HIV-Malária-TBC, Fundu Global sei apoiu milliaun $15 ba Timor-Leste
Moras malária hosi tinan 2021 to’o agora elemina daudaun, nune’e la rejista ona iha Viqueque, ne’ebé hanesan susesu boot, tanba ne’e ba oin sei esforsu ba moras TBC no HIV-SIDA.
“Durante ami mai Viqueque halo mós observasaun direta ba Sentru Saúde lima iha Viqueque no hosi vizita ne’e identifika difikuldade hosi parte pesoál saúde, liu-liu lojístika no finansa. Maibé ami nafatin halo koordenasaun ho parte programa TBC atu nune’e atividade nafatin la’o ba oin,” nia tenik.
Iha fatin hanesan, Diretór Servisu Saúde Viqueque, Pedro da Silva Pereira, agradese ba apoiu hosi Fundu Globál ba munisípiu Viqueque, ba moras TBC.
“Daudaun ne’e ekipa sira kontinua la’o ho mákina raiu-x tama sai postu administrativu sira. Ekipa CCM mós mai halo ona auditoria no haree ninia progresu servisu TBC iha Viqueque. Ho rezutadu sira, ida-ne’e sai kbiit tanba problema ne’ebé enfrenta maka rekursu umanu, dala-ruma ema ida dupla funsaun no ami nafatin husu ba parte Fundu Globál atu tau-matan nafatin ba Servisu Saúde Viqueque,” Diretór adianta.
Durante ne’e parte Fundu Globál apoia ona transporte karreta rua no motorizada ba servisu programa TBC iha Viqueque.
Tuir dadus rejista kazu TBC iha munisípiu Viqueque liuhosi raiu-x rejista pozitivu iha ema 100-resin, ne’ebé daudaun ne’e halo tratamentu, enkuantu Servisu Saúde Viqueque mós rejista kazu HIV-Sida hamutuk na’in-17.
Atividade ne’e partisipa hosi Sekretáriu munisípiu Viqueque, Xefe Sentru Saúde lima, pesoál saúde inklui Administradór Fundu Globál.
Jornalista : Vitorino Lopes da Costa
Editora : Julia Chatarina
