Diretór SEFOPE rejeita informasaun naran sidadaun Indonézia tama lista kandidatu traballadór
DILI, 16 juñu 2023 (TATOLI)—Diretór Nasionál Empregu Exteriór hosi Sekretaria Estadu Formasaun Profisionál no Empregu (SEFOPE) rejeita informasaun ne’ebé espalla iha públiku liuhosi rede sosiál, katak sidadaun Indónézia nia-naran tama lista kandidatu traballadór Austrália atu bá serbisu iha Austrália.
“Lista kandidatu traballadór Austrália nian ita fó sai horiseik atu halo teste ba fíziku nian, maibé mosu deskonfia iha sidadaun Indonézia ida ka rua nia-naran tama hotu lista, ne’e hoax tanba lista ne’ebé ha’u asina sempre iha kop surat, hanesan kop SEFOPE, RDTL no iha asinatura maibé lista ne’ebé mosu iha públiku laiha, signfika ida-ne’e hoax, ema mak manipula. Husu ba públiku labele fiar,” Diretór Nasionál Empregu Exterior, Filomeno Soares, hateten iha Timor Lodge, Comoro, sesta ne’e.
Notísia relevante : SEFOPE husu kandidatu traballadór rejistadu iha sistema atu aprezenta-an
Nia dehan, karik naran sidadaun Indonézia mak tama duni iha lista kandidatu traballadór, maka parte SEFOPE sei buka tuir.
Diretór esplika, joven ne’ebé asesu vaga iha SEFOPE ne’e lori ho dokumentu kompletu no komprovativu hosi Ministériu Justisa hanesan eleitorál, ficha família, Billete Indentidade (BI), sertidaun batizmu no pasaporte.
“Tanba ne’e laiha sidadaun ida hosi Indonézia mak lori identidade Indonézia nian atu ba asesu. Ita-nia knaar mak atu trata ema-nia kontratu serbisu iha rai-li’ur, maibé bainhira mosu dokumentu legál sira ne’ebé mak bele fó asesu ba sidadaun ida bá buka serbisu ne’e, maka Ministériu Justisa nia kompeténsia atu haree ba kestaun ne’e, tanba ami simu ne’e dokumentu legál ne’ebé komprova hosi Ministériu Justisa,” nia tenik.
Jornalista : Arminda Fonseca
Editora : Julia Chatarina
