DILI, 14 juñu 2023 (TATOLI)–Sekretaria Estadu Formasaun Profesionál no Empregu (SEFOPE) husu ba kandatu traballadór timor-oan sira ne’ebé rejistadu maibé seidauk hetan oportunidade bá serbisu iha Austrália atu aprezenta-an iha SEFOPE.
“SEFOPE liuhosi Diresaun Nasionál Empregu Exteriór (DNEE) hakarak fó hatene ba kandidatu traballadór timor-oan sira hotu ne’ebé rejistu ona iha sistema Work Ready Poll (WRP) ka sistema baze dadus SEFOPE hosi tinan 2016, 2018, 2020 no 2021, ne’ebé seidauk hetan oportunidade bá serbisu iha Austrália, favór mai aprezenta-an,” Diretór Nasionál Empregu Exteriór, Filomeno Soares, hateten liuhosi nota ne’ebé Agência Tatoli asesu, kuarta ne’e.
Diretór Ezekutivu dehan, razaun kandidatu sira ne’e tenke aprezenta-an tanba pesoál hirak ne’e bainhira funsionáriu SEFOPE kontaktu liuhosi númeru telemóvel rejistadu iha sistema, maibé númeru la ativu.
“Kandidatu sira ne’e bainhira ami kontaktu liuhosi telefone la ativu, aleinde ne’e balun mate ona, no balun bá ona Inglatera, Portugal no Koreia Súl,” nia akresenta.
Notísia relevante : Traballadór timor-oan 1.350 iha Austrália no Koreia Súl sees hosi sistema
Nia fó hanoin, ba hirak ne’ebé iha kualifikasaun ba área saúde, parteira, atendimentu sosiál, atendimentu komunitária tenke lori sertifikadu relevante bainhira aprezenta-an.
Nune’e, kandidatu traballadór sira ne’e bainhira ba aprezenta-an tenke lori ho kartaun eleitorál no pasaporte hodi bele haree filafali iha sistema WRP, ne’ebé loron aprezenta-an hahú hosi 12 to’o 16 juñu 2023.
“Karik la aprezenta-an liuhosi loron ne’ebé define ona maka parte diresaun la konsidera hanesan traballadór disponível ka la prontu atu bá serbisu iha Austrália no sei esklui hosi sistema baze dadus SEFOPE nian,” Diretór alerta.
Tuir dadus hosi SEFOPE, daudaun ne’e rejista ona kandidatu traballadór hamutuk 15.000 iha sistema baze dadus WRP desde kedas programa Seasonal Labour Programme (SWP) loke iha tinan 2012 no tuir kedas Pacific Labour Scheme (PLS) ne’ebé agora sai ida de’it ho naran Pacific Australia Labour Mobility (PALM) scheme.
Maski nune’e, to’o agora Timor-Leste foin haruka traballadór dala 8.000 resin bá Austrália (traballadór balun bá dala-rua to’o dala-lima), nune’e signifika sei iha barak mak la konsege hetan oportunidade bá serbisu iha Austrália.
Indústria serbisu ne’ebé oferese hosi programa PALM mak hanesan ospitalidade, ortikultura, meat field ka fábrika ko’a naan, perka no aged care (haree ema idozu).
Jornalista : Antónia Gusmão
Editora : Julia Chatarina
