DILI, 23 maiu 2023 (TATOLI)—Diretór Nasionál Empregu Exteriór (DNEE) iha Sekretaria Estadu Formasaun Profisionál no Empregu (SEFOPE), Filomeno Soares, hateten, traballadór timor-oan 1.350 ne’ebé hetan oportunidade serbisu iha Austrália no Koreia Súl sees hosi sistema.
“Adidu sira pasa dadus katak traballadór 1.350 ne’ebé serbisu iha Austrália no Koreia Súl sees hosi sistema molok mosu situasaun COVID-19 to’o agora,” Diretór informa ba Agência Tatoli iha ninia knaar fatin, Becora, tersa ne’e.
Notísia relevante : Traballadór timor-oan serbisu iha Austrália hetan ona remesa millaun $200 resin
Traballadór sees hosi sistema iha Austrália hamutuk 650, ne’ebé númeru ne’e inklui ona iha tinan 2023 nian hamutuk 20 resin no Koreia Súl hamutuk 700 resin.
Nia dehan, traballadór ne’ebé foin sees hosi sistema tanba influénsia malu.
“Husu ba traballadór sira labele sees hosi sistema tanba bainhira akontese sei fó impaktu ba imi tanba la seguru. Traballadór sei lakon asuransi ka direitu ba saúde no seluk tan,” nia akresenta.
Traballadór sira ne’ebé hetan ona oportunidade serbisu iha Austrália hahú hosi tinan 2012 to’o tinan 2023 hamutuk 1.301 no Koreia Súl hosi tinan 2009 to’o 2023 hamutuk 5.457.
Jornalista : Arminda Fonseca
Editora : Julia Chatarina
