Prabowo simu ona konvite atu vizita Timor-Leste
DILI, 28 Agostu 2026 (TATOLI) – Prezidente Prabowo Subianto aseita ona konvite atu vizita Timor-Leste. Konvite ne’e hato’o hosi Prezidente Timor-Leste José Ramos-Horta durante enkontru ho Prabowo iha Palásiu Merdeka iha Jakarta iha Sesta, 28 Agostu 2026.
Ministru Kultura Fadli Zon, ne’ebé tuir enkontru ne’e, afirma katak Prabowo hatán ona ba konvite ne’e.
“Prezidente Ramos-Horta konvida Prezidente Prabowo mai vizita Timor-Leste. Prezidente dehan, ‘Ami konserteza sei ajenda ida-ne’e,” Fadli observa hafoin enkontru.
Tuir Fadli, Prezidente Prabowo hato’o ba Ramos-Horta katak Indonézia mantein “polítika viziñu di’ak”. “Ne’e polítika ida atu sai viziñu di’ak ba ita-nia viziñu sira hotu—Timor-Leste, Austrália, Filipina, Tailándia, Singapura, no Malázia,” dehan polítiku Partidu Gerindra nian.
Nia hatete katak Prabowo loke hela oportunidade sira ba kooperasaun iha setór oioin ho administrasaun Ramos-Horta. Maibé, Fadli la espesifika bainhira maka Prabowo sei vizita Timor-Leste.
Arif Satria, Xefe Ajénsia Nasionál Peskiza no Inovasaun (BRIN), ne’ebé marka prezensa iha enkontru ne’e, hatete katak Ramos-Horta ho Prabowo hasoru malu hodi hametin lasu sira. “Ho objetivu atu kontinua kooperasaun entre Timor-Leste ho Governu indonéziu”,” nia hatete hafoin enkontru.
Notísia relevante: Laueradu novel 20 halo parte iha delegasaun Prezidente Ramos-Horta hasoru Prabowo no Megawati
Fonte: Tempo
