EBF Lakonak Babo presiza aprezenta proposta atu hetan apoiu mobiliáriu eskolár
DILI, 16 juñu 2023 (TATOLI) – Eskola Bázika Filiál (EBF) Lakonak Babo, iha Covalima, falta meza no kadeira ba alunu sira, nune’e balun tuur de’it iha rai. Atubele hetan apoia mobiliáriu eskolár, Diretór Nasionál Patrimóniu Lojístiku no Teknolojia, Ministériu Edukasaun, Juventude no Desportu (MEJD), Pedro Reis, sujere atu eskola refere aprezenta proposta hodi bele hetan karteira eskolár.
Responsavel ne’e dehan diresaun patrimóniu lojístiku seidauk bele disponibiliza karteira eskolár ba EBF Lakonak Babo tanba seidauk simu proposta.
Diretór ne’e dehan nia parte halo ona konfirmasaun ba dadus eskola bázika 13 iha Covalima ne’ebé rejista atu hetan karteira eskolár ne’e, maibé EBF Lakonak Babo la inklui.
“Karik sira foin haruka proposta mai mós seidauk to’o ami-nia liman. Kuandu proposta maka tama ona mai ministériu depois dirije mai parte lojístika, konserteza sei hetan apoiu karteira eskolár”, dehan Pedro Reis ba Tatoli, iha Vila Verde.
Nune’e, nia sujere bá diretór EBF Lakonak atu halo konfirmasaun ho diresaun servisu edukasaun munisipál Covalima atu buka hatene sira-nia proposta ne’e haruka ona mai nasionál ka seidauk. “Karik submete ona mai nasionál, dirije ba sé atu nune’e parte nasionál bele halo konfirmasaun”, realsa.
Tuir dirijente ne’e, karteira eskolár ne’ebé Ministériu Edukasaun prodús iha tinan kotuk hamutuk rihun 20 no distribui ona 18.817 ba eskola 292 iha territóriu. Ba munisípiu Covalima distribuiu ona karteira hamutuk 1.177 ba eskola 18 kompostu husi pré-eskolár tolu, eskola bázika 13, sekundária jerál ida no tékniku-vokasionál ida.
Ba estabelesimentu eskolár sira ne’ebé presiza, diresaun asegura hela karteira hamutuk 300-resin iha armazein, nune’e bele distribui ba eskola ne’ebé presiza bainhira hato’o sira-nia proposta mai Ministériu Edukasaun bazeia ba númeru ne’ebé sira husu. Distribuisaun karteira eskolár ne’e dezde loron 07 setembru 2022.
Rekorde katak Profesór EBF Lakonak Babo, iha suku Debos, postu administrative Suai, Fernando do Carmo, hateten alunu balun tuur de’it iha rai hodi tuir prosesu aprendizajen.
“Ami-nia eskola sei menus kadeira no meza ba estudante primeiru anu, nune’e alunu sira balun tenke tuur de’it iha rai hodi tuir prosesu aprendizajen. Kondisaun eskola ladún favoravel ba ami, tanba plafón hahú ku’ak, nune’e la seguru ba ami atu hala’o prosesu aprendizajen”, Fernando do Carmo, hateten foin lalais ne’e ba Tatoli, iha Lakonak Babo, kuarta ne’e.
EBF Lakonak Babo iha alunu 220 no iha manorin hitu – permanente haat no kontratu tolu.
Notísia relevante: Estudante EBF Lakonak Babo Covalima tuur iha rai tuir prosesu aprendizajen
Jornalista: Tomé Amado
Editora: Maria Auxiliadora
