DILI, 16 juñu 2023 (TATOLI)—Inspetór Jerál Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P), Ernesto Monteiro, konsidera Timor-Leste presiza metodolojia no padronizasaun atu halo teste ba kualidade produtu ai-han iha Timor-Leste tantu nasionál no internasionál, nune’e presiza mós estabelese departementu ida.
“Departamentu metodolojia no padronizasaun ne’e importante tebes tanba metodolojia nu’udar siénsia ne’ebé trata kona-ba medida jerál hanesan ba volume, todan, kualidade produtu no seluk tan. Ida-ne’e ita presiza duni maibé to’o agora ita seidauk iha,” Ernesto Monteiro hateten ba Agência Tatoli liuhosi entrevista eskluziva ne’ebé hala’o iha estúdiu Farol, sesta ne’e.
Nia dehan, kona-ba infraestrutura kualidade nasionál tuir dekretu-lei metrolojia ne’ebé AIFAESA uza atu teste ba produtu sira hosi nasionál no internasionál tuir artigu 26/2016 artigu 17, sita departamentu ida ho naran metodolojia no padronizasaun.
Notísia relevante : AIFAESA esforsu implementa medida hodi garante kualidade produtu iha merkadoria
Nune’e, Inspetór Jerál esplika, metodolojia ne’e fahe ba parte tolu hanesan sientífiku, indústria no legál. Sientífiku no indústria daudaun ne’e hala’o hosi Instituisaun Kualidade Timor-Leste (IQTL), enkuantu ba kestaun legál hosi AIFAESA, I.P hodi kontrola atividade hotu, liu-liu área ekonomia hosi operadór ekonómiku.
“AIFAESA, I.P bainhira haree ema fa’an na’an iha merkadu, ekipa tenke uza aparellu hodi sukat kuantidade sasán tuir saida mak hakerek iha embalajen produtu. Aparellu medida ne’e importante tebes, tanba ne’e AIFAESA kontrola, maibé Timor-Leste presiza metodolojia no padronizasaun nasionál. Ezemplu hanesan iha Indonézia, bainhira hola produtu tenke iha padraun nasionál Indonézia,” nia akresenta.
Inspetór Jerál salienta, kona-ba kualidade tenke hamosu polítika padronizasaun nasionál hodi kontrola produtu merkadoria.
“Tanba liuhosi ida-ne’e mak ita bele hatene kualidade produtu tanba padraun ne’e katak kualidade mínimu tuir ita-nia kondisaun, tanba kualidade mak sei determina presu, bainhira kualidade a’as, presu mós a’as. Bainhira metodolojia no padraun iha ona mak halo kontrolu ba sasán ne’ebé atu sai bá internasionál, sirkula iha merkadu nasionál no atu tama mai territóriu bele di’ak, maibé to’o agora padraun ne’e rasik laiha, ita labele limita sasán sira ne’ebé tama mai, di’ak ka a’at mai hotu,” nia deskreve.
Ernesto Monteiro tenik, durante ne’e AIFAESA, I.P bainhira halo kontrola difísil oituan tanba padraun administrasaun seidauk di’ak.
“Atu kria metodolojia no padronizasaun ne’e la’ós ema ida ka rua mak deside, maibé parte hotu nian nune’e bele responde duni nesesidade rai-laran. Hanoin atu harii padraun nasionál Timor-Leste presiza iha estudu profundu, rekursu umanu no lei, tanba ita iha rekursu umanu mak foin bele halo dezeñu padraun, tanba padraun ne’e presiza iha kestaun esensiál tolu hanesan rekursu umanu, laboratóriu no prodús lei hodi bele fasilita tékniku sira halo kontrolu iha terrenu,” nia adianta.
Ba kestaun ne’e, Inspetór Jerál parte husu ba Governu foun atu tau atensaun hodi hamosu padraun nasionál ba produtu hodi bele asegura operadór ekonómiku nune’e sira bele kompete ba iha merkadu internasionál.
“Ita hotu hatene, la kleur tan ita hola parte ona iha ASEAN, entaun ida-ne’e hanesan ezijénsia ida mai ita hotu atu toma medida tanba nasaun hotu iha, só ita mak laiha. Tenke hatene prezensa metodolojia no padronizasaun ne’e importante tanba nia benefísiu boot tebes ba komunidade rai-laran no nasaun tomak,” nia fó hanoin.
Jornalista : Arminda Fonseca
Editora : Julia Chatarina
