Komisaun A finaliza diskusaun projeitu-lei Ordem Médiku Timor-Leste iha espesialidade
DILI, 16 junu 2023 (TATOLI)—Komisaun A trata asuntu Justisa no Konstituisionál iha Parlamentu Nasionál, finaliza ona diskusaun projeitu-lei Ordem Médiku Timor-Leste iha faze espesialidade.
Notisia Relevante: PN aprova projetu-lei Ordem ba Médiku TL iha jeneralidade
Entidade sira-ne’ebé komisaun hala’o audiénsia iha diskusaun faze espesialidade mak hosi parte médiku sira no tékniku hosi Ministéiru Saúde.
“Diskute iha espesialiadade hotu tiha ona no relatóriu paresér komisaun hatama tiha ona ba meza Parlamentu iha loron 26 fulan-maiu liu ba, atu bele meza Parlamentu ajenda ba votasaun finál globál,” Prezidente Komisaun A iha Parlamentu Nasionál (PN), Deputadu Joaquim dos Santos ‘Boraluli’, hateten ba Agência Tatoli, sesta ne’e.
Maibé, nia dehan, ajendamentu diskute iha plenária ne’e depende ba meza mak iha kompeténsia maibé haree tempu limitadu ona lejislatura dalimak nian mandatu besik ramata ona, nune’e bainhira inisiativa ne’e la konsege diskute mak sei kaduka.
Tanba reuniaun ikus plenária lejislatura dalimak iha 19 juñu de’it ona, ne’ebé inisiativa ne’e kaduka mak bainhira lejislatura foun mai bele kontinua inisiativa ne’e.
“Maibé la ajenda, segunda la ajenda ona, kaduka ona, agora Parlamentu foun mai hakarak hamoris fali bele, tanba lei ne’e diskute hotu tiha ona. PN ka Deputadu foun mai bele hola inisiativa aprezenta inisiativa ne’e fila-fali, bele diskusaun fali,” nia hateten.
Nia dehan, lei ne’ebé kria orden médiku ne’e iha artigu hitu de’it, hodi kria komisaun organizadora, artigu ida aprova estatutu ne’ebé iha estatutu ne’e mak iha artigu 100-resin.
Jornalista : Nelson de Sousa
Editór : Cancio Ximenes
